Bisbarra, 31 de maio do 2023 – O grupo municipal de teatro de Ames presenta a obra “Non podo máis!”, nas Casa da Cultura do Milladoiro e Bertamiráns.
“Non podo máis!” é unha comedia irreverente sobre os aspectos da vida que conseguen descolocarnos e sacarnos dos nosos cabais. A cita o 8 de xuño no Milladoiro e o 18 de xuño en Bertamiráns. No caso do Milladoiro a estrea será ás oito e media da tarde e no de Bertamiráns as seis. Os convites, que son de balde, pódense retirar xa na Billeteira electrónica do Concello de Ames.
Na peza o grupo porá sobre o escenario situacións recoñecibles, do día a día, onde a paciencia dos protagonistas será posta a proba. Como reaccionas cando alguén se cola diante de ti no supermercado? Ou que fas cando a túa filla adolescente se rebela e quere saír de botellón? Que camiño tomas cando vas a ese restaurante tan caro que che recomendaron e só che serve un prato baleiro chamado aroma de cocido?
“Non podo máis!” é unha escolma de escenas seleccionadas e creadas baixo esta premisa para conseguir así a complicidade e o sorriso dun público que ben se podería sentir identificado en moitas delas. O elenco está conformado por Carmela Pardal, Chelo Cajide, Cris Botrán, Emilia Mayo, Gene Martínez, Ilduara García, Maite Fajardo, Mirela González, Mirella Vázquez e Pablo Núñez.