Bisbarra, 30 de outubro do 2024 – O goberno municipal de Ames levará ao pleno ordinario de este xoves un suplemento de crédito de 1.020.373,59 euros que, no caso de ser aprobado, sairá do remanente de tesourería e destinarase a gastos xerais segundo a nota de prensa.
Non é o único asunto económico que se levará a este pleno xa que tamén se debaterá a aprobación do aumento da cantidade destinada a gratificacións, horas extraordinarias e horas complementarias para o exercicio 2024, quedando o importe global fixado en 339.986,80 euros.
Por outra banda tratarase a transferencia de créditos entre distintas áreas de gasto do orzamento municipal do exercicio 2024. O obxectivo desta operación é dispor de 60.000 euros de crédito para poñer en marcha unha nova campaña dos “Bonos Consuma”.
Outros temas
O pleno ten unha orde cargada de asuntos. Hai tamén dúas resolucións de contratos. Por unha banda o que regula o Servizo de Axuda no Fogar, SAF, que comezou a prestar servizo en abril do 2023 e tiña a posibilidade dunha prórroga por dous anos máis que agora se propón non ter en consideración e rematar o acordo vixente.
Tamén preténdese iniciar o expediente de liquidación do contrato de concesión do servizo público Ciclo Integral da Auga do Concello de Ames, fixando en concepto de liquidación un saldo a favor do Concello de 815.180,82 euros por distintos conceptos. Veremos si, como sucede en moitas ocasións, a empresa está de acordo ou presenta alegacións a esa liquidación.
Tamén relacionado coa xestión da auga hai unha serie de cambios nas categorías laborais da empresa municipal creada para a xestión do servizo. O Consello de Administración de Augas de Ames, EPEL, quere introducir tres correccións que consisten en eliminar a referencia ao grupo profesional 5 do posto de xerente, dado que non é persoal laboral, senón persoal directivo asimilado a alto cargo; modificar a porcentaxe de xornada dun posto de auxiliar administrativo con grupo profesional nivel B, que pasa do 62,5% ao 100%; e modificar o grupo profesional do posto de xefe/a do servizo que pasa do grupo profesional 4 ao 6.
Ademais, tratarase a aprobación das novas cotas pola continuidade na prestación do servizo de recollida e tratamento dos residuos sólidos urbanos e asimilables coa Mancomunidade Serra do Barbanza, ao tratarse dun servizo básico e ata que o Concello de Ames estude a forma máis eficiente de prestación do servizo. Deste xeito, haberá que, se procede, aceptar as cotas provisionais emitidas pola Mancomunidade Serra do Barbanza mentres se siga a prestar o servizo, e cuxo importe mensual ascende a 243.677,03 euros. Debido a isto haberá que dotar de crédito no orzamento 2024 para facer fronte as cotas pendentes de liquidar para o exercicio 2024 por importe de 518.816,43 euros.
O pleno será emitido en directo a través da canle de YouTube do Concello de Ames.
