Bisbarra, 11 de setembro do 2023 – A quinta edición da Semana Europea da Mobilidade, na que participa anualmente o concello de Ames, celebrarase do 16 ao 22 de setembro próximos.
A semana da mobilidade ten como obxecto debater e promover a utilización dunha mobilidade sostible, o uso do transporte público e de medios máis limpos e intelixentes. Con esta finalidade o programa inclúe andainas, xogos, coloquios, mostras e marchas ciclistas.
Este ano o lema será “Combina e móvete!” e a temática será a eficiencia enerxética. O alcalde de Ames, Blas García, recorda a importancia das obras que o Concello está a realizar en Bertamiráns e que tamén se levarán a cabo na N-550 no Milladoiro, exemplo de aposta pola mobilidade sostible no entorno urbano.
García explica que “As cidades son espazos que deben ser transitados máis pola xente que polos coches, o modelo debe cambiar” e engade que “é responsabilidade dos gobernante crear espazos amables, seguros e saudables”.
A Semana Europea da Mobilidade (SEM) é unha campaña que leva a cabo dende o ano 2002 a Comisión Europea, co fin de promover unha mobilidade urbana sostible, animando ao cambio de hábitos a prol da mobilidade activa, o transporte público e outras solucións de transporte limpas e intelixentes. Ata o momento, case 3.000 concellos europeos se sumaron á campaña deste ano.
Programa da “V Semana da Mobilidade”
O Concello de Ames organizará tres xornadas de actividades e calquera que o desexe poderá inscribirse no correo mobilidade@concellodeames.gal
– Sábado, 16: Xogos sobre rodas
Esta actividade está pensada para rapazada a partir dos 4 anos, dende as 17:00 horas ás 20:00 horas, no aparcadoiro de Agriños (en fronte a E.E.I do Milladoiro).
– Domingo, 17: “Andaina pola senda verde que une O Milladoiro e Bertamiráns”
Saída as 10:00 horas dende a Igrexa de San Xosé do Milladoiro. A veciñanza terá a súa disposición un bus para levar ás persoas de Bertamiráns a Milladoiro e, unha vez remate a actividade, este mesmo bus levará as persoas que o desexen de volta a Milladoiro
– Venres, 22: Marcha ciclista nocturna dende a Praza do Concello.
Esta marcha nocturna en bicicleta é a actividade tradicionalmente máis popular e que máis lle gusta á rapazada. Tratarase dun percorrido sinxelo e ben iluminado, duns oito quilómetros, pensado para que toda a familia poida sumarse. Sairase as 22:00 horas da Praza do Concello.
