Bisbarra, 5 de xaneiro do 2023 – O Tribunal Administrativo de Contratación Pública ven de resolver o recurso presentado pola adxudicación do servizo de axuda no fogar, SAF, de Ames cambiando o adxudicatario.
Como contamos no mes de outubro (ver nova aquí) a empresa que quedara en segundo lugar levou a adxudicación ao Tribunal. Agora o organismo público considera que a adxudicación do SAF deixou fora a empresa recorrente “sen argumentos relevantes” e outórgalle o contrato.
O desvelaba nunha nota de prensa o Partido Popular de Ames que acusa ao goberno local de actuar de forma pouco transparente. Os populares lembran ademais que a resolución demostra que as decisións tomada polo goberno local as costas do pleno, e aprobadas posteriormente nunha sesión extraordinaria, eran erróneas.
O contrato do SAF ten un valor estimado de oito millóns de euros. A resolución do Tribunal Administrativo de Contratación Pública considera que o goberno local non puido acreditar con “relevancia acreditada” os motivos polos que excluíu a empresa.
Nas razóns máis técnica a resolucion explica que se os pregos establecen que “un servizo é de similar natureza sempre que coincidan os dous primeiros díxitos dos seus respectivos códigos CPV (sistema de identificación e categorización de todas as actividades económicas), dita similitude debe ser aceptada e, en consecuencia, o servizo en cuestión alegado pola empresa recorrente (servizo realizado para a Axencia Pública Andaluza de Educación) debe considerarse similar ao licitado”. O Tribunal considera devandito servizo válido aos efectos de acreditar a solvencia técnica do recorrente.
Na resolución o Tribunal tamén explica que “Utilizar meros defectos formais ou non substanciais para negar a solvencia técnica e profesional da empresa e non permitirlle emendar tales defectos advertidos é unha vulneración dos dereitos do licitador”.
O PP de Ames considera o proceder do goberno local discrecional e discriminatoria “algo que empeza a ser bastante preocupante para todos menos para quen están dispostos a levantar a man á voz do seu amo sen preocuparse o máis mínimo polas consecuencias que poden ocasionar os seus actos ao Concello de Ames”.
