Xa hai tempo que a veciñanza do lugar de Ventosa na parroquia de Covas, en Ames, ven poñendo de manifesto que o trazado actual do Camiño de Santiago a Fisterra non coincide co percorrido tradicional que, segundo a memoria popular e testemuños de persoas maiores da parroquia, discorría por outro lugar diferente ao actual.
Este antigo camiño, ademais de ter maior valor patrimonial, evita o paso pola estrada principal, onde no núcleo de Ventosa atopase un punto especialmente problemático e perigoso para as persoas que fan a ruta a pé que teñen que atravesar a estrada AC-453, sen ningún paso de peóns nin ningunha outra medida que garanta a seguridade nunha zona de escasa visibilidade situada entre dúas curvas.
O BNG de Ames levará ao vindeiro pleno esta cuestión xa que consideran que “o Concello de Ames, en colaboración coa veciñanza, asociacións da zona e entidades relacionadas co Camiño, recompile información sobre o trazado histórico orixinal, valore a súa viabilidade como alternativa máis segura, e proceda á súa sinalización e ó seu mantemento así como á promoción e difusión como opción preferente do Camiño de Santiago a Fisterra ao seu paso entre o Alto do Vento e o núcleo de Ventosa”.
Recargo do IBI
Escarlata Pampín, voceira nacionalista, anticipa que tamén levarán ao pleno unha moción para regular un recargo no IBI para as vivendas desocupadas con carácter permanente. Pampín destaca que “o incremento desproporcionado do prezo da vivenda, tanto nos prezos de compra como de alugueiro, está a provocar un fenómeno de expulsión, onde moitas veciñas e veciños se ven obrigados a abandonar o noso concello na procura de alternativas habitacionais noutras localidades”.
Para o BNG resulta socialmente inaceptable que, mentres existe unha demanda crecente sen atender, o parque inmobiliario conte con vivendas desocupadas de xeito permanente. Esta situación, especialmente cando se trata de grandes tenedores, supón un uso ineficiente do solo urbano, un freo ao desenvolvemento social e económico de Ames e, sobre todo, un incumprimento da función social da propiedade.
“Propoñemos que se entenda como vivenda desocupada aquela que permaneza nesta situación de forma continuada e sen causa xustificada por un prazo superior a dous anos e que pertenza a titulares de catro ou máis inmobles de uso residencial, tamén propoñemos quen non se aplique o recargo en casos de: traslado temporal por razóns laborais ou formativas, situación de dependencia ou saúde, vivendas obxecto de litixio, rehabilitación en curso, ou vivendas á venda (máximo 1 ano) ou alugueiro (máximo 6 meses) a prezos de mercado”, sinala a voceira nacionalista.
