A veciñanza amesá mostra o seu malestar polo mal funcionamento do servizo de transporte metropolitano da Xunta de Galicia. Un escrito dirixido ao concello denuncia o intento da Garda Civil de poñer multas á xente de pe por non levar o cinto.
En esta ocasión é a veciñanza de Ames pero as queixas polo transporte metropolitano son unha constante ao longo de todo o ano. Problemas que se sumas aos que de cando en vez ten o transporte escolar. Nunha terra rural e dispersa a comunicación en autobús segue sen cubrir as mínimas necesidades.
O Concello de Ames, a través da Concellaría de Mobilidade, vén de darlle traslado á Dirección Xeral de Mobilidade de diversas queixas e reclamacións recibidas en relación á calidade do transporte metropolitano da Xunta de Galicia.
Multas?
Segundo un dos escritos presentado no Concello o xoves 13 o autobús que vai da Gándara á Rúa da Riosa foi detido pola Garda Civil na Barcia. Os axentes comezaron a avisar aos usuarios da obrigatoriedade de levar o cinto de seguridade pois “o importe da multa polo incumprimento da norma podía ascender a 200 euros”.
A nova medida espertou a risa de varios usuarios xa que a primeira hora conseguir un asento libre convértese en tarefa imposible unha vez a liña entra no núcleo urbano de Bertamiráns. A usuaria que remite o escrito pregúntase “a onde se pretende que enganche o meu cinto de seguridade se a maioría das veces adoito ir de pé encaixada entre a xente para non bater no chan. Por suposto que as medidas de seguridade na estrada son precisas para garantir a saúde física de aqueles que viaxamos en autobús, pero, se de verdade preocupa tanto esta cuestión, é preciso ofrecer primeiro un servizo digno de transporte público no que non poña a miña vida en perigo cada día”.
Problemas repetidos desde hai anos no transporte metropolitano e que, tamén desde hai anos, son denunciados sen que as melloras cheguen o, cando menos, dense cambios na boa dirección.
