Bisbarra, 1 de setembro do 2022- O concello de Ames presentou a programación infantil para o cuadrimestre que comeza e que durará ata finais de ano.
O calendario inclúe música, cinema, xogos, tradición oral, contos, maxia ou danza. A primeira actividade de esta programación infantil será hoxe mesmo no parque do Ameneiral de Bertamiráns, e mañá venres no parque dos Piñeiros do Milladoiro. Trátase de “Brincadeiras miúdas” de Cé Orquestra Pantasma. As actuacións será ás 18:00 horas, de balde e sen inscrición previa.
Programación completa
A programación ao completo pode consultarse premendo nesta ligazón.
Actividades para as crianzas dende setembro ata decembro
Setembro inclúe outras tres propostas. O mércores 21 proxectarase no Milladoiro “Valentina”, premio Goya 2021 á mellor película de animación. O venres 23, A Gramola Gominola levará o seu espectáculo musical “O poder da Superlingua” a Bertamiráns, mentres que Migallas Teatro pechara o mes no Milladoiro o venres 30, co obradoiro “Orella Pendella”.
A programación continuará en outubro con cinco actividades máis. A primeira será un obradoiro de arrolos con Mamá Cabra, o xoves 6 en Bertamiráns. O día seguinte, o venres 7 O Milladoiro acolle o espectáculo de danza “Mímesis”, de Zig Zag Danza. Na seguinte semana, o xoves 13, Raquel Queizas desenvolverá o conto musical “O xogo de Nano”, de novo no Milladoiro. Esta actividade deixará paso ao Festival de Maxia de Ames “Festimax”, que celebra a súa décimo sétima edición os días 21, 22 e 23 de outubro nas dúas vilas principais de Ames. Finalmente, o venres 28 Pakolas actuará en Bertamiráns coa estrea de “A Ramona pequena”.
No mes de novembro desenvolveranse catro propostas. O venres 4, Vero Rilo e Sonsoles Penadique levan o seu espectáculo “Historias con susto para durmir a gusto” a Bertamiráns. Esta actuación virá seguida de dúas propostas de Lydia Botana “Bolboreta” e Fabaloba, con “Quen canta Alí?”, o venres 18 en Bertamiráns, e “Un bico para Alí”, o xoves 24 no Milladoiro. Por último, novembro pecharase co Festival Cinema Miúdo, os días 25, 26 e 27 nas Casas da Cultura do Milladoiro e de Bertamiráns.
Para rematar o cuadrimestre, en decembro celebrarase a xa clásica visita do Apalpador a Ames, que este ano chegará ao Pazo da Peregrina de Bertamiráns, cargado de contos e cantos e cun agasallo máxico nacido na Serra do Courel, o venres 16 de decembro.
Actividades de animación á lectura
Do mesmo xeito, no outono volven tamén as actividades de animación á lectura, en forma de contos para a rapazada amesá de entre 3 e 8 anos, e que se desenvolverán nas bibliotecas do Milladoiro e de Bertamiráns entre outubro e decembro, sempre ás 17:30 horas.