Bisbarra, 15 de decembro do 2024 – Ames presentou un programa de Nadal protagonizado por varios departamentos municipais, con múltiples actividades dirixidas para todo tipo de públicos que se desenvolverán ao longo de todo o mes de decembro e comezos de xaneiro.
A programación do Nadal en Ames inclúe algunhas novas actividades con respecto a anos anteriores. Unha das principais é a realización dun Mercado de Nadal, que estará situado na praza da Maía, en Bertamiráns, durante os días 20, 21 e 22 de decembro.
Así mesmo, outra das incorporacións no programa é a carreira de obstáculos “Gladiator Kids” o sábado 28 na Área deportiva do Milladoiro, unha actividade dirixida aos pequenos de entre 3 e 12 anos na que poñerán a proba a súa resistencia e forza con retos adaptados a eles. Con todo, os pais tamén poden inscribirse para participar e pasar así unha xornada familiar diferente.
Actividades para todos os públicos
Unha parte importante da programación do Nadal está dirixida cara os máis cativos que, precisamente, son os que viven estas datas con máis ilusión. Ademais dos contacontos de Nadal, a cativada amesá poderá gozar das visitas de personaxes tradicionais do Nadal como o Apalpador, o venres 13 ás 18.00h no auditorio de Bertamiráns; a visita de Papá Noel, primeiro en Bertamiráns o sábado 21, de 11.00 a 13.30 horas e de 17.00 a 19.00 horas, na Casa dos Maiores, e despois no Milladoiro o luns 23, de 11.00 a 13.30 horas e de 17.00 a 19.30 horas, no Centro social; e, por último, visitarán Ames os Reis Magos nos primeiros días do 2025.
Na mesma liña, a rapazada tamén poderá divertirse coa visita de diferentes personaxes do mundo “Disney”; primeiro no Milladoiro o venres 27 e despois en Bertamiráns o sábado 28. Así mesmo, a programación inclúe concertos e obradoiros para todos os públicos ao longo do mes de decembro, unha nova edición dos encontros literarios ou a XVII edición da tradicional Carreira do Pavo.
A xuventude de Ames poderá gozar na mañá do 31 de decembro das xa tradicionais prebadaladas, un evento que contará coas actuacións dos gañadores do Canta con Ames e, ademais, realizarase a Xincana Xove na que se repartirán diferentes premios.
Non só hai actividades para os máis cativos, de feito, o 15 de decembro, terá lugar o Amessán que, desta volta, levará aos nosos maiores de excursión á discoteca “La Luna”. Esta iniciativa está enmarcada no programa municipal de envellecemento activo, co que se persegue o benestar dos maiores do Concello de Ames.
A programación pódese consultar ao completo premendo nesta ligazón. Para solucionar calquera dúbida ou inscribirse nas actividades, tamén se pode contactar coa concellería de Promoción Económica, no enderezo electrónico promocioneconomica@concellodeames.gal, coa de Deportes, no correo deportes@concellodeames.gal e a Aula da Natureza ao enderezo auladanatureza@concellodeames.gal.
