Bisbarra, 28 de outubro do 2022 – O concello de Ames valora abrir un expediente á empresa encargada da colocación das novas luces led no rural por incumprimento do contrato.
A falta de mantemento está provocando problemas no rural con conseguinte enfado da veciñanza. A substitución das antigas luminarias por led sufriu desde o primeiro momento que se foron ampliando ata chegar a caídas constantes do alumeado en xeral.
A maioría dos núcleos están tendo problemas con apagóns constantes. A obra está en prazo de garantía e a empresa é a encargada de substituír as luminarias que están avariadas, pero dita substitución estase executando cunha gran demora. Debido a isto o Goberno municipal requiriulle un informe ao director de obra para abrir un expediente de penalidades.
A Xunta de Goberno Local adxudicou en 2021 a obra de substitución do alumeado do rural por luces LED á empresa Serveo. Ames contou cunha axuda de 1.176.231,15 euros do Instituto para a Diversificación e Aforro da Enerxía (IDAE). O orzamento previsto para a execución do proxecto foi de 1.470.288,94 euros. O 80% do total sufragado con fondos europeos e o 20% restante, 294.057,79 euros, con fondos propios municipais.
A obra tiña un prazo de execución de seis meses que se ampliou ata practicamente o dobre de tempo. Unha vez rematada e recepcionada a obra esta ten un prazo de garantía para solucionar os problemas existentes, os cales a empresa non está a reparar a pesares das notificacións remitidas.
A intención, en canto se poida, é que o propio Concello se encargue con persoal propio de arranxar os problemas existentes no tendido eléctrico do rural, e posteriormente cargarlle os gastos derivados destas reparacións á empresa.