Bisbarra, 30 de maio do 2023 – O Motoclub Ameixenda, en colaboración co Concello de Ames e a Deputación da Coruña, organiza o vindeiro domingo, 4 de xuño, unha das probas de supercross da Galicia League.
O Gran premio Concello de Ames é un evento deportivo a nivel autonómico, non oficial, non federado, de acordo coa actual normativa galega. A proba terá lugar no circuíto SX Alex de Moure, sno lugar do Vilar na parroquia da Ameixenda, e nel participarán os mellores pilotos de supercross de toda Galicia.
Na actualidade Galicia conta con dous pilotos competindo no campionato do Mundo de Motocross: Jorge Prado, que actualmente é o líder do campionato, e Rubén Fernández, que está na terceira posición do mundial. Dende o Motoclub Ameixenda indican que para que pilotos como Jorge e Rubén cheguen a disputar o campionato do mundo teñen que organizarse probas como a de Ames que serven para que rapaces e rapazas se inicien neste deporte.
A “Galicia League, Crono Racing”, conta cun total de seis probas, nas que participan os mellores pilotos de supercross de toda Galicia, podendo destacar a Román Pérez, que foi campión de España e Portugal.
Para a organización da proba, o Motoclub Ameixenda conta coa colaboración do Concello de Ames, a Agrupación de Protección Civil de Ames, a Deputación da Coruña e o Salón de Beleza Paula, situado en Bertamiráns. Os/as participantes que se inscriban estarán divididos/as en sete categorías diferentes: Pro, Elite, Amateur, 85cc, 65cc, 50cc, e Féminas.
Horarios
Entre as 8:30 e as 10:15 horas da mañá desenvolveranse as verificacións técnicas e administrativas. De seguido, a partir das 11:00 horas, os pilotos participarán nos adestramentos libres e de clasificación. Ás 15:30 horas, dará comezo a proba que se compón de dúas mangas por categoría. Ao remate da proba realizarase a entrega de trofeos.
Circuíto SX Alex de Moure
O circuíto SX Alex de Moure dispón dunha pista de 680 metros por 6 de ancho e diferentes saltos: mesetas, dobres, etc. Este recinto de máis de 19.000 metros cadrados conta cun amplo aparcadoiro gratuíto, situado a escasos metros da pista de competición, e cunhas condicións óptimas tanto para a práctica do deporte como para contemplación desta modalidade deportiva.