Bisbarra, 6 de xuño do 2024 – O Partido Popular de Ames reclama que se habiliten as ferramentas necesarias para axilizar o traballo en Urbanismo.
Os populares de Ames explican que das licencias de construción solicitadas no 2023 en Ames, só se resolveron 17 e 24 están en tramitación. Outros 22 permisos están pendentes de presentar máis documentación.
Segundo o PP, foron varios os veciños que lle transmitiron ao executivo a preocupación pola demora que está a padecer o outorgamento das distintas licencias urbanísticas, principalmente as de obras e as de primeira ocupación.
Os populares de Ames van máis alá das queixas veciñais e falan de “indicios” que fundamentan as queixas. Explican que na liquidación dos distintos exercicios obsérvase como ano a ano a recadación do ICIO (imposto sobre construcións, instalacións e obras, que se paga no inicio da tramitación) non alcanza as previsións orzamentarias, mentres que a recadación pola expedición de taxas urbanísticas aumenta respecto ás cantidades recollidas nos distintos orzamentos municipais.
O retraso tan prolongado na aprobación das licencias “provoca serios prexuízos ós veciños que ven como o encarecemento do material de obra trastoca o seu orzamento ata o punto de que pode desembocar no rexeitamento de levar adiante a construción da vivenda” din desde o PP.
No relativo ás licenzas de primeira ocupación, o concelleiro de Urbanismo de Ames, a preguntas dos populares, explicou que “houbo unha modificación da Lei que agora permite simplemente unha comunicación previa, polo que non se dita resolución expresa de concesión destas licenzas, aínda que aclara que os expedientes solicitados en 2023 ascenden a 29”.
O PP pide máis axilidade no departamento de Urbanismo, ó que haberá que dotar das ferramentas necesarias para mellorar a resposta á cidadanía ou máis persoal unha vez que as cifras demostran que o que hai é insuficiente.
