Ames, 21 de maio do 2021 – O concello de Ames organizará unha Feira do Voluntariado na que participarán, os vndeiros 28 e 29 de maio, catro concellos e vintecatro entidades distintas.
A I Feira do Voluntariado de Ames celebrarase no Pazo da Peregrina. No programa inclúense relatorios, obradoiros exposicións e actuacións musicais.
O evento está organizado pola concellaría de Benestar a través da Oficiña de Voluntariado de Ames, OVA. No encontro participarán tamén as correspondentes oficiñas dos Concellos de Brión, Negreira e Vedra. Durante toda a feira poderá visitarse a exposición “Ames Coopera” e recolleranse bicicletas usadas para enviar a África.
As entidades participantes amosarán os seus proxectos e calquera que o desexe poderá obter información para facerse voluntario/a e colaborar en calquera dos múltiples programas que se dan a coñecer no evento. Para participar das actividades e os concertos o único requisito que se esixe é a doazón de alimentos non perecedoiros. Haberá servizo de autobús de balde desde o Milladoiro e desde as parroquias. Para poder utilizalo é necesario reservar praza nos teléfonos 662 377 302 e 683 327 375.
A I Feira do Voluntariado de Ames inaugurarase na tarde do venres, 28 de maio, ás 17:00 horas, co acto de recepción e benvida ás entidades participantes e unha mesa redonda na que Ames, Brión, Negreira e Padrón, debaterán sobre “O voluntariado municipal, participar para transformar”.
Na solaina e nos xardíns do pazo colocaranse 20 carpas onde as distintas entidades participantes amosarán os seus proxectos, ofrecerán información do que significa e que trámites hai que seguir para facerse voluntario/a e realizarán obradoiros e actividades para todas as idades.
Como xa acontecera coa Feira da Saúde organizada polo mesmo departamento, a Feira do Voluntariado de Ames ofrecerá un continúo de relatorios durante toda a xornada do sábado. Cómpre salientar os concertos cos que rematarán as dúas xornadas. O venres a cantautora arzuá M.J Pérez e o sábado os amesáns Arévalo e Giannetto Rock Soul.
Para a concelleira de Benestar e Igualdade, Luísa Feijóo, a importancia do voluntariado fíxose máis visible este ano “A crise sanitaria, social e económica provocada pola COVID-19 puxo de manifesto mais que nunca a necesidade e a importancia do voluntariado, dese traballo, ese tempo, ese coñecemento e esa formación que homes e mulleres poñen a dispor dos mais vulnerables para conseguir unha sociedade mais xusta”. Feijóo insiste en que “non é necesario facer grandes cousas, nin irse lonxe para elo, o importante é facer , participar”. A concelleira convida a toda a veciñanza a achegarse “para coñecer as asociacións e ONGS participantes e o seu labor e para participar das diferentes actividades, obradoiros e faladoiros que terán lugar nesta Feira”.
