O goberno local de Ames levará, ao pleno de este xoves, a aprobación dun suplemento de crédito para sufragar gastos relativos ao funcionamento ordinario dos servizos municipais por máis de 3 millóns de euros.
Novo pleno ordinario en Ames este xoves no que a xestión económica municipal será sen dúbida un punto quente na sesión. O goberno municipal do socialista Blas García presenta para aprobación un suplemento de crédito de 3.163.636 que se financiarían cos remanentes de tesourería. Hai que lembrar que a diferenza do ano 2024 en este exercicio o goberno traballa cos orzamentos prorrogados.
Os gastos aos que se destinarían estes cartos, segundo a orde do día, serían os derivados do “funcionamento ordinario dos servizos municipais”; tamén financiarían “o compromiso de incremento do 25% no complemento específico do persoal municipal para o presente exercicio, que permanece pendente de aplicación ata que se efectúe a correspondente modificación orzamentaria”; o goberno municipal engade que “para rematar o exercicio é necesario dotar crédito en distintas áreas do orzamento de gasto para o normal funcionamento de servizos municipais como o de recollida e tratamento de lixo, gastos dos servizos educativos e complementarios de educación, gasto corrente e gastos en investimentos.
Taxa polo servizo de recollida, transporte e tratamento de residuos
Outro dos asuntos a tratar é a aprobación inicial da ordenanza fiscal reguladora da taxa polo servizo de recollida, transporte e tratamento de residuos.
Na ordenanza vixente, ademais do servizo de recepción obrigatoria, incluíanse outras prestacións relacionadas coa hixiene urbana como son a recollida de vehículos abandonados, recollida da vía pública de carteis, soportes, pancartas, limpeza de muros, valados, limpeza de cerramentos, etc); prestacións que por lei non poden figurar xuntamente coa recollida, transporte e tratamento de residuos.
Na nova ordenanza emprégase un novo método de cuantificación das tarifas. Ames nun primeiro momento non opta por repercutir o 100% do custo aos usuarios do servizo, senón que se sitúa en torno ao 75% do custo. Na configuración da taxa establécese unha cota fixa por unidade de vivenda ou local destinado a actividade e unha cota variable, que para as vivendas variará en función das persoas empadroadas na mesma, e para as actividades establécese un importe por metro cadrado de superficie do local.
POS+ Adicional
Ademais, abordarase a aprobación do POS+ Adicional 4/2025. Ao Concello de Ames correspóndenlle 498.473,30 euros, dos cales o importe de 152.984,36 euros vanse destinar a gasto corrente, e o resto da contía que ascende a 345.488,94 euros vaise destinar a investimentos financeiramente sostibles.
Gratificacións e horas extras
Outros dos temas a tratar é a autorización do incremento da cantidade global destinada á asignación de gratificacións, horas extraordinarias e horas complementarias no orzamento do Concello de Ames para o exercicio 2025, quedando o importe global fixado en 394.885,46 euros. Dita autorización queda supeditada a entrada en vigor do suplemento de crédito 3/2025.
Centro deportivo municipal A Telleira
A Corporación debaterá sobre a revisión de prezos da xestión e mantemento do centro deportivo municipal A Telleira para o exercicio 2026. O incremento cuantificase no 2,3% e resulta do calculo do IPC galego tomando como referencia os períodos xullo 2024 a xullo 2025 e terá efectos dende 1 de xaneiro de 2026, unha vez se aprobe definitivamente a modificación da ordenanza reguladora do prezo público pola utilización do centro deportivo municipal A Telleira.
Apartado de mocións
Por último, abordaranse dúas mocións políticas do grupo municipal popular para a mellora da seguridade viaria na DP-0206 ao seu paso polo concello de Ames, e sobre os vertidos no río Sar provocados polas obras de construción da nova depuradora de aguas residuais de A Silvouta, en Santiago de Compostela.
