Bisbarra, 15 de febreiro do 2023 – O concello de Ames aprobou en pleno o destino do cerca de millón de euros do que disporá grazas ao Plan Único da Deputación entre a anualidade 2023 e a complementario do 2022.
Os investimentos da Deputación destinaranse na súa maior parte a investimentos. Dentro das partidas resérvanse 100.000 para gastos correntes e algo máis de 11.000 para redución de débeda con entidades financeiras. O concello contará ademais con 157.314 euros para gasto social.
O Plan Único 2023 foi o primeiro en ser debatido e aprobouse por unanimidade. Algunhas das obras que inclúe son a pavimentación de viarios no núcleo de Framil (Biduído) e maila mellora da seguridade viaria en Frenza (Tapia).
Coa partida da Deputación correspondente aos remanentes do 2022 sufragaranse actuacións como a pavimentación de viarios no núcleo de Cortegada (Ameixenda) e maila pavimentación de viarios no núcleo de Gasamáns (Agrón). Esta partida inclúe tamén o proxecto de eficiencia enerxética na iluminación das rías anexas ao parque empresarial Novo Milladoiro. Con esta actuación preténdese continuar coa implantación do aforro enerxético en todo o municipio.
Plan complementario de 2023
O Plan complementario de 2023 inclúe investimentos financeiramente sostibles. Con cargo a esta partida preténdese executar nove proxectos que contan cun orzamento base de licitación total de 1.636.548.80, euros.
Continuando coas melloras no rural contémplase a pavimentación de viarios en Oca, na parroquia de Ames; no núcleo de Mourigade, na parroquia de Bugallido; e maila pavimentación en O Galiñeiro, na parroquia de Agrón.
Tamén se actuará en viarios de comunicación entre lugares como o proxecto de mellora de seguridade viaria de O Mercuto a Quintáns na parroquia de Ameixenda; a estrada de Capeáns a Pousada, na parroquia de Covas; ou na mesma parroquia a realización das beirarrúas dende Covas ao Lombao.
Nunha liña similar, pero dentro dun ámbito máis preto aos núcleos urbanos, están previstas as obras da pavimentación da rúa Juan Bueno Bueno e de viarios no Castro, ambas as dúas obras na parroquia de Ortoño. Por outra banda acometerase a adecuación dunha nave existente para a implantación dunha cociña central, coa pretensión de darlle servizo aos comedores escolares de Ames.
POS+ Adicional 1/2023
O Plan POS adicional 1/2023 da Deputación, destinado a gasto social, foi tamén aprobado por unanimidade. En el destinaríanse 111.084,18 euros ao reforzo de persoal (técnico e/ou administrativo) adscrito aos departamento de servizos sociais co obxectivo de apoiar ao equipo de persoal actual e/ou facilitar a tramitación urxente das prestacións obxecto deste plan e axilizar a atención social profesional necesaria en situacións de risco para persoas vulnerables.
O importe restante, que ascende a 46.229,84 euros, dedicaríase á ampliación e dotación de partidas municipais destinadas a axudas de emerxencia ás persoas soas ou familias en risco de exclusión social: maiores, persoas con diversidade funcional, mulleres en risco de exclusión social ou vítimas de violencia de xénero, cando eles/as e as persoas ao seu cargo, carezan de medios económicos suficientes para asegurar a cobertura das necesidades básicas: vivenda, alimentación, electricidade, educación, gastos médicos ou farmacéuticos, transporte, e aqueles que consideren os servizos sociais municipais.
