Bisbarra, 14 de outubro do 2022 – O Partido Popular de Ames pregunta pola pavimentación dos accesos a aldea de Ventín que terán que estar rematados antes de finais de ano.
Os populares explican que o proxecto de Ventín ten un prazo de execución de seis meses e que comezaron a contar en xuño pasado. Denuncian ademais que pese as súas preguntas non recibiron ate o momento ningunha resposta do equipo de goberno.
O proxecto de pavimentación de viais interiores e accesos á aldea de Ventín data de xaneiro do 2021 e foi aprobado en pleno no mes de febereiro. Forma parte do Plan Complementario do POS + 2021. En marzo de este ano aprobouse o expediente de obras que foi adxudicado en maio cun importe de 229.999,99 euros e un prazo de execución de seis meses. O contrato formalizouse en xuño pasado.
O Partido Popular recoñece que hai marxe aínda pero que van catro meses desde a formalización do contrato sen que as obras comezaran. O 22 de setembro solicitaron toda a información sobre a acta de replanteo, que marca o comezo do prazo de execución, sen que ata o momento tiveran resposta a dita demanda. Os populares lembran que ese tipo de peticións teñen un prazo legal para ser contestadas que se está incumprindo.
O Partido Popular de Ames reclama de novo a documentación e pide que comece a desenvolverse o proxecto e se evite un “Nadal en obras en Ventín”.
