Bisbarra, 28 de decembro do 2022 – Ortoño, en Ames, acolle este venres unha xornada dedicada á historia das campás con dúas charlas e un concerto.
Será no adro da igrexa de San Xoán de Ortoño as cinco da tarde. Organizado pola Asociación Cultural Campaneiros de Galicia, o concerto leva por título “As campás, o son do Camiño” e servirá para a inauguración da recente reposición da terceira campá da igrexa parroquial de Ortoño e da instalación dunha cuarta, de volteo, que completa o campanario.
O concerto busca responder á pregunta “que é o que escoita un peregrino dende que se levanta pola mañá ata que se deita pola noite?” baixo o lema “Descubre o son das campás ao longo do Camiño de Santiago”. Para iso, no recital interpretaranse numerosos toques empregados polos campaneiros ao longo da historia: dende os máis habituais, como os utilizados nas eucaristías, ata os máis tradicionais, que actualmente están fóra de uso, como os que regulaban a vida civil ata o século XX.
Os integrantes da asociación reproducirán o toque de alba, o de Ángelus, ou o de lume, entre outros, simbolizando os momentos nos que as campás indicaban, por exemplo, o momento de erguerse ou de facer unha parada na xornada de traballo; pero tamén outros máis específicos, como unha emerxencia ou a chegada dunha tormenta.
Por outra banda, no reitoral ofreceranse dúas charlas duns quince minutos cada unha. A primeira delas, a cargo de Estanislao Fernández de la Cigoña, versará sobre a historia das campás. Fernández de la Cigoña, naturalista e investigador, foi fundador e presidente da Asociación Galega para a Cultura e Ecoloxía, e os seus achegamentos nos ámbitos da natureza e a etnografía galega son de gran valía. En concreto, ao longo da súa carreira profesional ten feito especial fincapé nas mostras de iconografía relixiosas e no seu impacto no territorio galego.
Seguidamente, José Enrique López Ocampo, último fundidor de campás de Galicia, explicará como é o seu proceso de fabricación, dende a creación con barro e bronce ata a colocación no campanario. Ocampo, descendente dunha familia de Arcos da Condesa adicada á fundición de campás dende o século XVII, mantén na actualidade o último dos talleres artesanais de fabricación de campás que existe en España.
Para obter máis información sobre o toque manual de campás, que o 30 de novembro deste ano foi declarado Patrimonio Cultural Inmaterial da Humanidade, pódese consultar a páxina web da parroquia de Ortoño premendo nesta ligazón.
