Eleccións 23, 12 de abril – Ames Novo, unha das mareas referentes do municipalismo no 2015, non se presentará aos comicios do vindeiro 28 de maio aínda que non se disolven como formación política.
Nun comunicado emitido onte martes, Ames Novo explica que nos últimos meses mantivo conversas con outras formacións con ánimo de recuperar protagonismo na corporación pero “tomaron a decisión de rexeitar cada unha delas por diferentes motivos e non presentar lista evitando contribuír a unha maior fragmentación do voto da esquerda”.
Algunha fontes apuntaban a que o actual concelleiro, Quique Costas, fora tentado por Contígo Pódese que viu como Gemma Otero, actual concelleira de facenda, decidía tamén non presentarse como candidata e deixar a política. En calquera caso Ames Novo anuncia tamén “a súa decisión de non disolverse, estar presente na política local desde a base da cidadanía e traballar na construción dunha alternativa cidadá con capacidade de gobernar no horizonte de 2027”.
A formación non fai recomendación de voto de cara aos comicios pero “fan un chamado á cidadanía progresista para utilizar o seu voto de xeito que Ames poida seguir contando con un goberno de progreso fronte ás alternativas involucionistas que representan as dúas candidaturas da extrema dereita (UCIM e Vox) e a alternativa conservadora do PP”.
Ames Novo conseguira catro concelleiros no período 2015 – 2019 pero a falta de acordo con Psoe e BNG levounos á oposición. A marcha no 2017 de Pilar Candocia e Chus Boo deixou ao grupo con Quique Costas como cabeza visible pero nas eleccións do 2019 só conseguiu unha acta de concelleiro. A non concorrencia confirma a morte do movemento das mareas municipais.
O grupo sen embargo mostra a súa intención de “traballar para reorganizar o espazo común da cidadanía progresista que, prescindindo de siglas, queira traballar a prol dun Ames máis centrado na xente”. Ames Novo marca o tempo posterior as eleccións como o momento de “reiniciar un proceso de confluencia das persoas, con ou sen adscrición partidaria, que desexen construír ao longo dos próximos catro anos desde a reflexión e a acción conxunta unha alternativa política cidadá, progresista e con vocación de goberno cara as seguintes eleccións municipais”.
