A edición deste ano das “Noites en Vela” coas actuacións de As Maianas e Caamaño & Ameixeiras, prevista para este 19 de xullo, celebrarase finalmente o vindeiro 30 de agosto debido ás condicións meteorolóxicas previstas para este sábado
A Ponte Maceira, que divide os concellos de Ames e Negreira encherase de luz e música nunha nova edición das “Noites en Vela” que organizan os concellos de Ames e Negreira
Na Barcala e na Maia é unha desas citas que marcan o comezo do verán, aínda que cada ano acode máis xente de toda a bisbarra e non poucos turistas, As “Noites en Vela” son un evento literalmente bonito e calmado nun lugar moi especial como a Ponte Maceira.
Ata ese sitio desprazáronse os alcaldes de Ames, Blas García, e Negreira, Manuel Ángel Leis, para presentar as “Noites en Vela” que se celebrarán o 30de agosto as nove da noite, desois de que fora aprazada a primeira data do 19 de xullo. Os convidados musicais son Maianas e Camaño & Ameixeiras, un gran nivel musical para unha noite moi especial.
O programa está organizado conxuntamente entre os departamentos de Cultura de Ames e Negreira, e busca poñer en valor unha paraxe paisaxística e monumental como é A Ponte Maceira, declarada ben de interese cultural (BIC) no ano 2022 e localización que forma parte da listaxe dos pobos máis bonitos de España.
O alcalde de Ames, Blas García, subliñou que “as Noites en Vela son unha das nosas celebracións máis destacadas, cun telón de fondo incomparable como é A Ponte Maceira. Os Concellos de Ames e Negreira colaboramos con moito gusto para facer que a nosa veciñanza desfrute dunha noite de música e espectáculo”.
O alcalde de Negreira, Manuel Ángel Leis, destacou que “dende o Concello de Negreira seguimos apostando por este evento porque cremos que é un bo xeito de potenciar o turismo na Ponte Maceira, un dos lugares máis fermosos que temos nos dous concellos. As Noites en Vela é un xeito de poñer en valor e dar a coñecer A Ponte Maceira, a través da música. Todos os anos ten unha gran afluencia de veciños e veciñas dos dous concellos, de peregrinos e turistas”.
As Maianas e Caamaño & Ameixeiras
A agrupación de cantareiras “As Maianas”, formado en Ames no 2007, destacan pola súa proposta con temas de composición propia nos que empregan sons e ritmos da música tradicional galega nos que se valen de instrumentos coma as pandeiretas, cunchas ou a propia percusión corporal.
Pola súa banda, “Caamaño & Ameixeiras” é un dúo formado en 2018 composto por Sabela Caamaño e Antía Ameixeiras moi ligado tamén á música e baile tradicional. Na actualidade contan con prestixio tanto a nivel nacional coma internacional. Tomando como partida inicial sons populares da nosa terra, este dúo crea pezas de composición propias cun selo moi persoal nas que mesturan o tradicional con recursos máis contemporáneos.
A actividade é de balde.
