Bisbarra, 19 de setembro do 2024 – Polo momento a oposición veciñal non consigue cambios no proxecto de humanización da travesía do Milladoiro, Ames, e o luns comezan as obras.
O Ministerio de Transporte ven de emitir unha nota de prensa na que informa sobre os traballos a realizar, os posibles inconvenientes para a veciñanza e as alternativas dispoñibles para eludir as obras do Milladoiro. O vindeiro luns 23, a partir das oito e media da mañá, reduciranse de a poucos os catro carrís a tan só dous. Esta situación calcúlase que se manterá, segundo a nota do Ministerio, ata finais do 2025.
As recomendacións son que “os itinerarios entre a cidade de Santiago e Padrón fáganse evitando a travesía de Milladoiro, utilizando a autovía AG-56 e a Vía de Alta Capacidade VG-1.7”. As propostas pasan polo uso do tramo gratuítos da autoestrada AP-9 combinado coa SC-20, estrada de Noia, e a variante das Galanas. Estradas polas que xa é obrigatorio circular aos vehículos máis pesados.
No caso dos traxectos locais, para acceder ás vivendas ou establecementos do núcleo urbano de Milladoiro, “recoméndase utilizar rúas paralelas á travesía de Milladoiro, para evitar circular polo tramo en obras.
Para acceder e saír do Polígono de Novo Milladoiro recoméndase utilizar os viarios que conectan o polígono coa VG1.7 na ligazón de Biduído, e a súa posterior conexión coa AG-56. Polo momento non parece que o proxecto presentado teña cambios nin intención de implementalos, a partir dos luns veranse con máis claridade as consecuencias da redución de carrís.
