As obras de Ames están incluídas no Plan Camiña Rural 2025-2026 e veñen de ser adxudicadas por un importe de 64.396,37 euros.
A Xunta de Goberno Local de Ames aprobou a adxudicación das obras de mellora do camiño en Quintáns e do viario que vai de Proupín a Lamas, incluídas no Plan Camiña Rural 2025-2026.
O proxecto foi adxudicado por 64.396,37 euros (IVE incluído) e foi aprobado previamente no pleno ordinario celebrado o pasado 26 de xuño de 2025. A Axencia Galega de Desenvolvemento Rural (Agader) aporta 53.220,14 euros, mentres que o Concello de Ames achega a contía de 11.176,23 euros.
O gasto está dividido en dúas anualidades: 31.372,57 euros en 2025 e 33.023,80 euros en 2026. O concelleiro de Obras e Servizos Básicos, Gustavo Nieto, explicou que “para participar na convocatoria deste plan elaborouse o proxecto denominado Mellora de camiño en Quintáns e outro”. Este proxecto contempla ademais a mellora do camiño de Proupín a Lamas.
O proxecto de mellora ten como finalidade conservar e mellorar as infraestruturas rurais, facilitando así a accesibilidade e vertebración do territorio e contribuíndo ao aumento da competitividade agraria e forestal, xa que facilitan o tránsito de maquinaria ás explotacións agrarias, o que redunda nunha maior axilidade das operacións agrarias e nunha redución de custos e dos tempos necesarios para poñer os produtos no mercado.
Mellora do camiño de Quintáns
As obras de mellora executaranse nun camiño de 460 metros de lonxitude e un ancho medio de 3 metros, xunto cunha superficie de 25 metros cadrados no entronque. En dita superficie procederase á pavimentación do camiño con 15 centímetros de zahorra artificial.
Previamente, nun treito de 170 metros disporase unha capa de regularización de 5 centímetros de espesor medio. Nos 290 metros restantes será preciso proceder á roza e limpeza do camiño e á retirada da terra vexetal.
Previo á capa de zahorra executarase unha base con 40 centímetros de material de préstamo. As tarefas de pavimentación complétanse coa execución de 15 centímetros de pedra 32/63 mm, tratamento semiprofundo, tratamento superficial e tratamento de selado.
No contacto entre o entronque do camiño co viario asfaltado colocarase unha canaleta prefabricada de PVC con reixa de fundición clase D – 400 para a recollida de augas pluviais, xunto cun pozo de rexistro para o seu desaugamento á rede de drenaxe existente. Tamén se contempla a limpeza de cunetas en ámbalas marxes e a colocación de 1 sinal de stop.
Mellora de Camiño de Proupín a Lamas
Nun treito de 190 metros de lonxitude e 5,50 metros de ancho medio, xunto cunha superficie de 30 metros cadrados no entronque, procederase á pavimentación mediante 15 centímetros de pedra 32/63 mm, tratamento semiprofundo, tratamento superficial e tratamento de selado. Nun treito de 930 metros de lonxitude e 3,00 metros de ancho medio disporase unha capa de 15 centímetros de zahorra sobre unha capa de regularización de 5 centímetros de espesor medio con material de préstamo. Previamente procederase ó saneo das zonas máis deterioradas con pedraplén. Tamén se contempla a limpeza de cunetas en ámbalas marxes e a colocación de 1 sinal de stop.
