A Xunta de Goberno Local de Ames vén de aprobar a licitación do servizo de mantemento preventivo, correctivo e técnico legal do alumeado público. O obxectivo é adxudicar o mantemento de toda instalación de alumeado público e iluminación monumental de titularidade municipal
O orzamento base de licitación ascende a 619.076,88 euros (IVE incluído). As empresas interesadas terán ata o 16 de marzo para presentar as súas ofertas. O alcalde, Blas García, destaca que “durante os últimos anos o Concello de Ames apostou polo aforro enerxético co cambio a LED no Milladoiro e Bertamiráns”.
O concelleiro de Obras e Servizos Básicos, Gustavo Nieto, engade que “o desenvolvemento tecnolóxico das instalacións de alumeado exterior, pasadas a Led, fai que o mantemento deste tipo de instalacións sexa cada vez mais complexo e precise de empresas especializadas ”.
Prestación do servizo
Por outra banda está o alumeado festivo. A empresa adxudicataria deberá promover o abastecemento a eventos culturais, ociosos ou deportivos desenvolvidos principalmente nos núcleos do Milladoiro e Bertamiráns, aínda que tamén de xeito esporádico nas demais parroquias de Ames. Este abastecemento será mediante a instalación de cadros eléctricos conectados á liña da distribuidora ou mediante grupos electróxenos subministrados pola empresa adxudicataria.
Do mesmo xeito, a prestación do servizo comprende o mantemento preventivo e o control da iluminación, o mantemento correctivo e o mantemento técnico legal. Ademais, tamén se contemplan outros servizos asociados, como o alumeado festivo, certificados, informes, presupostos, axudas e tramitacións.
Actualmente, en todo o termo municipal hai un total de 7.043 unidades de luminarias instaladas. Non obstante, para efectos contractuais, tómase como referencia o inventario realizado pola auditoría enerxética no 2019, que contempla un total de 7.200 luminarias.
A empresa adxudicataria estará obrigada a manter os modelos, características e calidades dos equipos existentes, salvo en casos especificados polos servizos técnicos municipais.
