Bisbarra, 7 de marzo do 2024 – O concello de Ames traballa nas limpezas subsidiarias das vías e franxas secundarias pendentes antes de que chegue a época de verán.
Estas limpezas subsidiarias serán acompañadas da apertura por parte do concello de Ames expediente sancionador. A sanción contempla a incautación da madeira cortada, a asunción do custo dos traballos realizados e unha multa económica.
O Director Xeral de defensa do Monte, Manuel Rodriguez, achegouse ata o Concello de Ames para coordinar co departamento de Xestión do Medio Rural estas limpezas pendentes. Na visita o responsable da Xunta reuniuse co alcalde, Blas García, e co concelleiro de Xestión do Medio Natural, Javier Antelo.
Antelo apreciou o xesto do Director Xeral e a boa disposición amosada para cumprir o compromiso acadado no pasado mes de agosto “Apreciamos o xesto do Director Xeral de achegarse a Ames e comprobar de primeira man algunhas das parcelas que incumpren reiteradamente a limpeza nas franxas secundarias. É vital que estes traballos avancen a bo ritmo antes da chegada do verán”.
Manuel Rodríguez pola súa banda puxo en valor o alto grao de coordinación e colaboración existente entre a Xunta e o Concello de Ames na prevención dos incendios forestais e comprometeuse a continuar nesta liña de traballo coas autoridades municipais para acelerar os traballos de limpeza que comezarán de inmediato.
Convenio de colaboración entre Xunta, Fegamp e Seaga
A xestión dos espazos, para a prevención do lume, corresponde aos titulares dos terreos e, de xeito subsidiario, aos concellos. No ano 2018 a Xunta subscribiu un convenio de colaboración coa Federación Galega de Municipios e Provincias e coa empresa pública Seaga que permitiu crear un sistema público de xestión da biomasa nestas faixas.
Este convenio de protección das aldeas, ao que xa están adheridos un total de 283 concellos, é dicir, o 90,41% dos municipios galegos -entre eles o de Ames-, busca contribuír e garantir a prevención de incendios forestais, para que deste xeito se acade unha diminución do número de lumes nas zonas de interface urbano-forestal, o que repercute no interese público polo que supón para a seguridade das persoas e dos bens.
