Ames, 1 de febreiro do 2018 – Despois da polémica xerada coa nova Lei de Protección e benestar animal que obriga aos concellos a facerse cargo do coidado dos animais abandonados, e que motivou o posicionamento en contra da propia Fegamp polo custo que suporía, o PP de Ames insta ao goberno municipal a que cumpra.
A nova Lei de Protección e benestar animal entrou recentemente en vigor. Esta norma establece que é o concello quen ten que autorizar ou dar permiso para que un veciño poida auxiliar a un can ou gato abandonado, salvo situacións de emerxencia. Tamén contempla o “sacrificio cero”; polo que o custo do mantemento e coidado dos animais abandonados débeo asumir o concello que recolla ao animal ata que consiga localizar a o dono ou o entregue en adopción ou acollida. Doutra banda o concello tamén deberá asumir o custo que supón a esterilización dos animais abandonados.
O PP lembra en nota de prensa que “o Concello de Ames leva bastante tempo tentando licitar, sen éxito, o correspondente servizo de lacería de animais abandonados e perdidos, por un importe de 36.211,34 €. O pasado mes de agosto do 2017, o procedemento aberto foi declarado deserto ao ser excluída do procedemento a empresa clasificada en primeiro lugar; e a día de hoxe non hai noticias dun novo procedemento de Licitación. Tampouco conta Ames cunha ordenanza sobre a cuestión que se axuste ás esixencias da nova lei que entrou en vigor o pasado 11 de xaneiro”.
Os populares consideran que, partindo desta situación, para cumprir coa nova lei haberá que modificar os pregos de cláusulas administrativas e técnicas para poder licitar correctamente o servizo, e habilitar unha partida orzamentaria suficiente para cumprir coas esixencias da nova lei.
O PP de Ames pide ao goberno municipal que cumpra coa Lei Galega de Protección e Benestar dos Animais de Compañía, aprobando a correspondente ordenanza; licite, axustándose aos novos requisitos, o correspondente servizo de recollida e coidado de animais abandonados ou perdidos; e habilite nos Orzamentos 2018 unha partida económica, especifica e suficiente, para facer fronte ás obrigacións de Ames nesta cuestión.
