Comezou oficialmente o Nadal no concello de Ames. A cerimonia contou con Jesús, do bar Rufino da Ponte Nova (Agrón); Lola, de Mercería Marlo de Bertamiráns; e Carlos, de Papelería e Administración de lotería Boo do Milladoiro como convidados.
O acto foi presentado polos artistas e veciños de Ames, Marta Alonso e Pablo Reboleiro, e contouse coa actuación de arredor de 50 alumnos/as da Escola Municipal de Música e dos coros de Bertamiráns e do Milladoiro do programa Amessán.
Para combater o frío dispúxose unha degustación gratuíta de chocolate con churros. A churrería Jorge repartiu 900 churros e 150 litros de chocolate entre a veciñanza amesá que se congregou na praza do Concello. As luces de Nadal estarán acendidas en horario de 18.00 a 02.00 horas ata o día 6 de xaneiro (incluído).
O alcalde, Blas García, destacou que “as tres persoas que este ano acenden o alumeado fano en representación do sector comercial e hostaleiro de Ames, que teñen a valentía de poñer un negocio en marcha e que teñen moito mérito”. Tamén convidou á veciñanza “a gozar do Nadal que é un época para pasar en familia e con aquelas persoas que queremos”.
Outra das novidades deste ano foi o concurso que se realizou entre as persoas que acudiron con prendas e accesorios propios do Nadal como xerseis, diademas, bufandas, gorros, etc. Os presentadores os encargados de elixir ás dúas persoas con mellor caracterizadas. As gañadoras, Uxía e Alejandra, foron premiados/as cun vale de 50 euros para gastar nos comercios adheridos á Xuntanza de Empresarios de Ames.
Alumeado de Nadal
Instaláronse máis de 140 elementos decorativos para iluminar o Nadal por todo o termo municipal. En cada parroquia do rural colocouse como mínimo un elemento decorativo. Entre ditos elementos hai máis de 100 arcos decorativos e outros elementos decorativos.
No Milladoiro cóntase cunha gran árbore artificial iluminada na zona de estacionamento da rúa Agro do Medio e por primeira vez pódese pasar por debaixo dela andando; e unha “A tridimensional” de Ames de 2,5 metros de alto na praza da Madalena.
Tamén se instalou un teito de luces na rúa Anxeriz do Milladoiro. Ademais, na avenida de Rosalía de Castro, cóntase con 10 arcos luminosos ao longo da rúa; dous arcos de entrada e saída no termo municipal; e hai 5 renos luminosos (2 na mediana de Rosalia de Castro, 1 na zona verde da rúa Viorneira e 2 na zona verde da rúa da Costa Grande).
Por outra banda, en Bertamiráns, decorouse a árbore que se atopa na praza do Concello, e colocouse un motivo luminoso co número 2026 de dous metros de alto na praza da Maía.
