Bisbarra, 16 de xuño do 2023 – A agrupación socialista de Ames decidiu gobernar en minoría mentres que na Baña Psoe e BNG formarán unha coalición para os vindeiros catro anos.
O secretario xeral socialista en Ames, Blas García, explicaba que se trataba dunha decisión tomada despois dun debate interno. Recoñecía que non se afondara nas negociacións co BNG xa que se estaba producindo ese debate na agrupación.
Preguntado por si non consideraba unha contradición ter defendido os gobernos de coalición como un modelo de consenso e agora optar por gobernar en minoría, Blas Garcia consideraba que se trata dun paso adiante que buscaba o que denominan “un goberno de cooperación”.
Aínda que as áreas de traballo non están todas definidas, os concelleiros que xa estaban na corporación manterán as que xestionaban e incorporarán outras. Gustavo Nieto, un dos novos concelleiros, encargarase de obras e servizos básicos. Área que xa xestionara con Carlos Fernández de alcalde.
Blas García avanzou tamén que a intención e que cada grupo municipal da oposición teña unha dedicación exclusiva ademais do administrativo xa recollido no ROF. Esta dedicación non a poderá ter Luísa Feijoo xa que “a lei marca que un grupo municipal é o que ten máis de dous concelleiros” en palabras de Blas García.
A lei dispón 40 días para que se celebre o pleno de organización, a partir da toma de posesión. Será aquí onde a negociación entre os grupos comezará a complicarse xa que definirá os recursos cos que contará o goberno municipal.
Decepción no BNG
O candidato do BNG, David Santomil, considera que non é que quere Ames e lembra o sucedido no pasado cos gobernos en minoría. Recoñece que o Psoe xa apuntara esta posibilidade en campaña e engade que eles sempre defenderon a coalición como mellor forma de goberno.
Santomil di sentirse decepcionado xa que o Psoe doulle “un portazo” ás esperanzas dunha parte da poboación
Con respecto ao pleno de organización, David Santomil agarda que “en esta ocasión si” o Psoe se sente a negociar e se cheguen a acordos que permitan o traballo do goberno municipal e “tamén da oposición”.
A investidura de Blas García está garantida ao ser a lista máis votada. O BNG non presentará un candidato alternativo ao existir un acordo a nivel galego entre ambas as dúas formacións aínda que queda por saber si o voto nacionalista será a favor ou de abstención, situación que poría sobre a mesa desde o primeiro momento a soidade do grupo de goberno.
A Baña terá coalición de goberno
José Antonio Pereira será desde este sábado o novo alcalde de A Baña. Este xoves pola mañá alcanzaba un acordo co BNG polo que Mónica González será a primeira tenente de alcalde e encargarase da área de servizos sociais.
O acordo afirma unha maioría absoluta no pleno e relegará ao Partido Popular á oposición. José Pereira e Mónica González terán dedicacións exclusivas e conformarán o resto do goberno a partir do vindeiro luns xa que hai tempo suficiente antes do pleno de organización.
