Bisbarra, 14 de febreiro do 2023 – Ames presentou as distintas actividades que terán lugar con motivo do Día de Rosalía, que se conmemora o vindeiro xoves, 23 de febreiro.
O programa inclúe iniciativas que se estenderán durante varias semanas e preténdese revitalizar o pensamento e a figura de Rosalía. Son un total de citas que teñen como obxectivo poñer en valor a obra da poetisa entre a veciñanza e contribuír a que o alumnado dos centros de ensino se acerquen á poesía.
A programación Rosalízate está deseñada e organizada polos departamentos de Normalización Lingüística, Mocidade, Turismo e Bibliotecas municipais. Comeza onte coa colocación do photocall Rosalízate, instalado na praza do Concello, en Bertamiráns, e diante do centro de saúde do Milladoiro. Tamén onte abriuse a actividade O Xardín de Rosalía que organizan as Bibliotecas municipais do concello.
Para o martes, 21 de febreiro, ás 19.00 horas, está prevista a presentación do libro Mordouelias, Rosalía e As Terras da Maía. Será na Casa da Cultura do Milladoiro e contará coa presenza de Anxo Angueira e María López Sández. Ese mesmo día, ás 18.30 horas, plantarase unha filla da figueira da Casa – Museo Rosalía de Castro doada ao Concello de Ames.
O xoves, 23 de febreiro, ás 10.30 horas, farase un obradoiro de Rosalía coa asociación Arcea-Adames na biblioteca municipal do Milladoiro.
Por outra banda, do xoves 22 ao domingo 26 de febreiro desenvolverase unha nova edición das iniciativas “Caldo de Gloria” e “Café con verso” nos locais de hostalaría. Repartiranse unhas tarxetas con versos rosalianos para difundir a súa obra, pensamento e figura. A iniciativa Café con verso xurdiu no ano 2017 froito da colaboración entre o Concello de Ames e mailo poeta amesán Carlos Negro.
Ademais, a hostalaría servirá o caldo que a escritora describe no seu poema Miña casiña, meu lar de Follas Novas, e no que unha muller pobre conta como consegue, fronte ás adversidades que a rodean e ás súas propias penurias, facer un caldo de gloria. Con el non só logra alimentarse e sobrevivir: na súa humildade e ao pé do lume da lareira tamén é feliz. Así, os establecementos que participen recibirán tamén manteis de papel nos que se plasme ese mesmo poema.
O venres, 24 de febreiro, ás 17.30 horas, desenvolverase na biblioteca do Milladoiro a actividade denominada A miña historia. Trátase dun conto para achegarse á figura de Rosalía da man de Trémola Teatro.
Gala homenaxe a Rosalía de Castro
A Gala de homenaxe a Rosalía de Castro realizarase o sábado, 25 de febreiro, ás 19.00 horas, na Casa da Cultura de Bertamiráns. Participarán os centros educativos de Ames e contarse coa actuación de Najla Shami. A Gala estará presentada por Esther Estévez.
Ademais, o sábado 4 de marzo, farase a actividade Viaxando con Rosalía, unha viaxe literaria á Casa Museo Rosalía de Castro, situada en Padrón, guiada pola experta rosaliana María López Sández. A saída farase ás 10.00 horas, mentres que o regreso será ás 14.30 horas.
O herbario de Rosalía
Por último, do xoves 16 de marzo ao domingo 2 de abril farase unha exposición no Pazo da Peregrina, en Bertamiráns, sobre O herbario de Rosalía. Poderase visitar os xoves e venres, de 17.00 a 20.00 horas, e os sábado e domingos, pola mañá de 11.00 a 14.00 horas, e pola tarde de 17.00 a 20.00 horas.
Para rematar o xoves 16 de marzo, ás 19.00 horas, plantarase a camelia híbrida Rosalía de Castro, doada pola Casa-Museo Rosalía de Castro, e ás 19.30 horas inaugurarase a exposición cunha visita guiada.
