Bisbarra, 26 de novembro do 2024 – Despois de que un neno caera nun pozo en Bertamiráns, por sorte sen consecuencias, o concello de Ames pide axuda para localizar outros pozos e poder pechalos.
O Concello de Ames fai un chamamento á colaboración veciñal para a detección de estes pozos sen rexistrar, cubrir ou en mal estado. Tanto para comunicar a súa ubicación como para rexistralos pódese chamar ao 981 88 30 02 en horario de 9.00 horas a 15.00 horas; hai que falar co departamento de Medio Ambiente. Outra opción é escribir a gabinete@ames.gal cos datos do pozo en cuestión.
O pozo no que o pasado sábado caeu un rapaz de 6 anos estaba localizado nunha finca de titularidade privada. O Concello de Ames inicia agora unha campaña na que reclama colaboración veciñal para a detección deste tipo de infraestruturas, que representan un gran perigo para a poboación debido a que habitualmente encóntranse en mal estado por mor do abandono por parte dos propietarios ou mesmo polo propio descoñecemento da súa existencia.
Afortunadamente o cativo atópase en bo estado e os propietarios da finca xa foron notificados para que procedan a tapar o pozo. Dende o Concello apélase á responsabilidade dos donos para manter en bo estado estas infraestruturas e a rexistralas para evitar incidentes como o do pasado sábado. Por outra banda anúnciase que se fará unha revisión das propiedades municipais por se puidese existir algún pozo do que na actualidade non se teña constancia e pídese colaboración para a detección dos mesmos.
Fai pouco máis dunha semana xa se actuou dende a concellería de Medio Ambiente nunha finca próxima ao CEIP de Barouta, despois de que un veciño alertara dun pozo descuberto nas inmediacións do centro. Dende o Concello `procedeuse a cubrir o pozo e a balizalo, para despois localizar e notificar ao propietario do terreo, que resultou ser a Xunta de Galicia, quen automaticamente pasou a facerse cargo da situación.
