Espazo Común denuncia a mala execución da obra de mellora da seguridade viaria en Covas non se corresponden co proxecto presentado.
Falabamos non hai moito dos problemas de accesibilidade das obras de humanización da rúa Rosalía de Castro no Milladoiro, en Ames. Agora denuncian a mala execución do proxecto de mellora dunha vía en Covas.
Dende Espazo Común denuncin o estado no que se está a executar a obra de mellora da seguridade viaria no lugar de Covas, que une A Igrexa co Lombao. Unha actuación incluída no POS Adicional 2/2024, cun orzamento de 121.609,66 euros para 465 metros de cuneta transitable, que tiña como obxectivo reforzar a seguridade peonil.
Segundo o proxecto aprobado, a senda debe contar cunha base de 15 cm de zahorra e 15 cm de pavimento de formigón con mallazo, previa demolición do pavimento anterior onde fose incompatible coa nova solución proxectada.
Segundo Espazo Común a realidade que se observa no lugar é moi distinta “como nos relata un veciño da zona, máis ben parece que volcaron alí un camión de formigón, sen o coidado, detalle nin calidade técnica que unha obra destas características require”.
A voceira, Luísa Feijoo, di que “ a veciñanza, que leva anos demandando esta actuación , merece respecto. E o que se está a facer é, máis ben, unha burla: unha execución deficiente que, co paso do tempo, a chuvia e o inverno, pode provocar que o tramo quede en peores condicións das que xa tiña”.
Espazo Común solicita un seguimento rigoroso da execución desta obra, así como das restantes que se están levando a cabo, xa que “temos constancia de outras actuacións mal executadas. É imprescindible que todas conten coas certificacións, sinaturas e controis pertinentes antes da súa recepción e pagamento por parte do Concello”.
