O Xulgado do Social condena ao concello de Ames a pagar unha indemnización de 15.000 euros.
Nun comunicado emitido hoxe Espazo Común de Ames desvelou que o Xulgado do Social nº 1 de Santiago condenou á empresa municipal Augas de Ames por impedir a entrada do delegado sindical no Consello de Administración e obriga ao Concello a indemnizar con 15.000 euros.
Espazo Común lembra que Augas de Ames é a primeira “porta xiratoria do municipio” xa que nomeou como xerente da empresa municipal de augas a ex concelleira de Podemos Genma Otero co voto de calidade do alcalde sendo a candidata con menor puntuación.
A sentencia recoñece que se vulnerou o dereito á liberdade sindical ao impedir que o delegado de persoal ocupase o posto estatutario que lle correspondía no Consello de Administración, unha obriga recollida no artigo 8 dos Estatutos da EPEL, nomeando no seu lugar a unha persoa “ad hoc”.
Espazo Común lembra que, ademais desta condena, a Empresa Municipal de Augas non foi capaz tampouco de cumprir cas expectativas económicas xa que se prevía uns beneficios de medio millón de euros que finalmente foron de 43.172,65€.
Espazo Común esixe a “asunción inmediata de responsabilidades políticas e o respecto pleno á representación sindical recoñecida legalmente. Unha empresa pública non pode seguir sendo refén de manobras partidistas; o goberno de Ames debe dar resposta á altura que merecen os veciños e veciñas”.
