Bisbarra, 26 de maio do 2023 – O concello de Ames e XEA, Xuntanza de Empresarios de Ames, convocan a terceira edición do concurso de fotografía Enfoca Ames.
O obxectivo deste certame é fomentar o achegamento da cidadanía aos lugares máis emblemáticos do concello. Os participantes do Enfoca Ames terán que presentar unha fotografía que recolla o patrimonio natural, artístico e/ou cultural do municipio.
O prazo de entrega das imaxes está aberto ata o vindeiro 11 de xuño. As fotografías teñen que ser enviadas xunto coa ficha de inscrición por correo electrónico ao enderezo enfocames@gmail.com.
No certame poden participar todas as persoas residentes en España, maiores de 18 anos, con independencia do seu lugar de orixe. As fotografías teñen que ser orixinais e inéditas. A inscrición no concurso é gratuíta.
Admítese unha fotografía por cada unha das categorías: paisaxe, macro e artística. Na categoría paisaxe a fotografía debe mostrar os espazos do mundo que adoitan captar a presenza da natureza, pero tamén poden centrarse en características creadas polo home ou perturbacións das paisaxes.
Na categoría macro a fotografía debe permitir amplificar as cousas que son pequenas a simple vista. Por último, na categoría artística permítese a posibilidade de editar e manipular a captura orixinal. Esta categoría está relacionada cun aspecto máis subxectivo e incluso surrealista.
As bases recollen a concesión de tres premios en cada unha das tres categorías. O primeiro de 100 euros, o segundo de 50 euros e o terceiro de 25 euros. Os nove premios son cheques para gastar nos comercios asociados á XEA.
O resultado do concurso será publicado o día 20 de xuño nas páxinas web de XEA e do Concello de Ames. As persoas agraciadas serán notificadas mediante chamada telefónica. Este ano o xurado estará composto por 4 persoas. Dos 4 membros do xurado, dous serán aportados por XEA e outros dous polo Concello de Ames.
