Ames, 20 de agosto do 2021 – A Concellaría de Promoción Económica do Concello de Ames decidiu esperar ata o 15 de setembro para dar comezo á seunda fase da campaña de bonos de compra Merc@mes.
Calquera persoa, residente ou non, no concello de Ames, pode adquirir os bonos que se poñerán a venda a partir do mesmo día 15 de setembro en Bertamiráns e no Milladoiro, tan só presentando o DNI que o acredite como maior de 18 anos. Ata o momento hai 207 establecementos adheridos a esta campaña.
A promoción durará ata o 15 de novembro. A relación dos establecementos adheridos será publicada na páxina web municipal e na páxina web da entidade colaboradora, XEA. O Concello de Ames inverte 92.000 euros en axudas directas a adquisición de bonos para incentivar as compras nos establecementos comerciais do Concello nesta segunda fase da campaña. Esta contía inclúese no programa Ames Progresa que se aprobou no pleno ordinario do mes de xullo.
A tarxeta-bono Reactiva Ames é unha tarxeta prepago a través da cal o Concello de Ames poñerá ao dispor das persoas beneficiarias unha axuda igual ao 40% do valor da mesma. O Concello de Ames nesta segunda fase da campaña poñerá ao dispor dos beneficiarios, a través da entidade colaboradora, un total de 2.800 tarxetas que funcionarán como unha tarxeta visa prepago, con banda magnética, sen chip nin PIN (anónimas).
Estas tarxetas poderán ser utilizadas en futuras promocións que se poñan en marcha desde o Concello de Ames. O Concello de Ames cofinanciará dous tipos de tarxeta-bono Reactiva Ames:
- 1.000 tarxetas Reactiva Ames por valor de 50 euros. Do valor total da tarxeta o Concello de Ames achegará 20 euros e a persoa beneficiaria achegará 30 euros.
- 1.800 tarxetas Reactiva Ames de 100 euros. Do valor total da tarxeta o Concello de Ames achegará 40 euros e a persoa beneficiaria achegará 60 euros.
O Concello aporta o 40% do valor dos bonos
O Concello de Ames destina a esta segunda fase a cantidade de 100.400 euros, dos que 92.000 euros son axudas directas á adquisición de bonos e os 8.400 euros restantes destinásense a sufragar os custos que supón a adquisición das tarxetas-bono. A achega municipal supón un 40% do saldo de cada tarxeta como medida de apoio ao comercio local. A axuda de 100.400 euros que dará o Concello ás asociacións de comerciantes permitirá poñer en movemento 230.000 euros para gastos directos no comercio local, que sumados aos 200.000 da campaña anterior suman unha cifra de 430.000 € de volume de negocio.
Unha tarxeta bono de cada tipo por persoa
A axuda do Concello de Ames é igual ao 40% do valor da tarxeta-bono solicitada pola persoa beneficiaria. Cada persoa poderá solicitar e adquirir un máximo de 1 tarxeta-bono de cada tipo; é dicir, cada persoa poderá adquirir como máximo unha tarxeta bono de 50 € e unha tarxeta bono de 100 euros. As persoas que na primeira fase da campaña colleran unha soa poderán coller a outra . As persoas que teñan xa as dúas tarxetas, non poderán coller outras. Lémbrase ás persoas solicitantes que non tiren as tarxetas xa que poderán reutilizalas nas próximas campañas .
