Bisbarra, 12 de xuño do 2023 – A Rede Municipal de Comedores Escolares de Ames recibiu a acreditación de comedores escolares Km 0 e pasan a formar parte da rede galega.
A acreditación Km 0 para comedores escolares está impulsada pola asociación Slow Food Compostela. Tratase dun colectivo ecogastronómico que promove unha “nova gastronomía” entendida como expresión da identidade e da cultura.
No acto de recepción participaron a presidenta da asociación Slow Food Compostela, Leonor Lorenzo; o concelleiro de Educación e Axenda Urbana en funcións, David Santomil; e técnica municipal do departamento de Educación, Rosa García.
As placas entregadas acreditan que nas cociñas dos comedores escolares de Ames se empregan produtos de proximidade e se aposta pola sustentabilidade a través da xestión de residuos. As placas colocaranse nas cociñas das escolas infantís municipais O Bosque, de Bertamiráns, e A Madalena, do Milladoiro, así como nas cociñas do CEIP Agro do Muíño da da EEI Milladoiro.
Dende o ano 2015 o Concello de Ames está realizando un esforzo importante para incorporar novos produtos de proximidade, en particular produtos da horta, aos menús da Rede municipal de comedores escolares. No 2020 sumáronse á primeira edición da campaña “Come Local”, promovida pola Consellería do Medio Rural, a través da Axencia Galega da Calidade Alimentaria (Agacal) en colaboración con Slow Food Compostela.
Para obter a distinción Km 0, o departamento municipal de Educación tivo que realizar diferentes trámites. Un deles enviar unha lista dos provedores cos que se traballa para que fose analizada por Slow Food Compostela e certificasen que se cumpren os requisitos esixidos para dispor de dita distinción.
Aprovisionamento dun 50% ou máis de produtos galego
Neste senso a presidenta da asociación Slow Food Compostela, Leonor Lorenzo, explica que “unha vez que os centros compren uns determinados requisitos, en liñas xerais, aprovisionarse dun 50% ou máis de produtos galegos e mercando parte dos mesmos directamente ao produtor fomentando as canles curtas de comercialización e as plantacións a medida, outórgaselle a distinción de Comedor Escolar Km 0, para darlle visibilidade e que sirva de exemplo para moitos máis que queiran unirse a este proxecto. Este é o caso da Rede municipal de comedores escolares do Concello de Ames que despois de 4 anos de asesoramento pola nosa parte, acada por fin este distintivo”.
