Bisbarra, 12 de abril do 2023 – O concello de Ames segue co seu abril de cine e este sábado proxectarase a web serie “Pringadas” sobre os problemas da xeración Z.
A cita será na Casa da Cultura do Milladoiro o vindeiro sábado, día 15, a partir das oito da tarde. As entradas pódense adquirir no seguinte enlace. “Pringadas” acadou o Carballo Interplay e estivo nominada nos XXI Premios Mestre Mateo como mellor serie web.
En “Pringadas”, Xoana, Catu e Antía, tres universitarias, amigas e compañeiras de piso, exploran temas como o amor, a rotura coas amizades ou as enfermidades de transmisión sexual. A estética da serie busca reproducir os códigos visuais propios da xeración Z, como a volta á moda dos 80.
A peza, dirixida por Belén Puime, que tamén estará presente na proxección da película, está filmada en recoñecidos lugares de Santiago de Compostela, como a residencia Monte da Condesa, a Cidade da Cultura ou diversas rúas do casco histórico, achegando así aos espectadores a unha realidade moi próxima á súa.
