A un ano e pouco para as vindeiras eleccións municipais parece que o Psoe de Ames, que goberna en minoría, camiña cara a unha moción de confianza. Ven de presentar uns orzamentos que non contan co respaldo suficiente nin para conseguir unha abstención de PP ou BNG que permitira a súa aprobación.
Tanto os populares como os nacionalistas avanzan que votarán en contra. O Partido Popular non foi nin chamado a negociar e co BNG só existiu unha reunión, na que non estivo o alcalde, e tras a cal respondeuse ás demandas do BNG por correo electrónico.
Uns orzamentos consolidados
Así as cousas todo a punta a uns orzamentos que terán que ser aprobados vía moción de confianza. Os orzamentos que os socialistas levarán ao pleno de Ames ascenden a 43.334.228,98 euros. Inclúen o orzamento municipal de 38.753.577,15 euros e mailo orzamento da EPEL Augas de Ames de 4.580.651,83 euros.
Trátase do orzamento máis elevado da historia de Ames, o que supón un incremento do 18,89% con respecto ás contas do ano 2024; aprobadas en aquel momento grazas á abstención do BNG e que foron prorrogadas no 2025.
O crecemento chega principalmente pola consecución de fondos EDIL que fan un total en investimentos de 8.096.920,23 euros, o que supón case un 21% do total do orzamento, que xunto coa prestación de servizos (42,65%) supoñen un 63,54% do total.
Este mércores celebrouse a Comisión Informativa de Economía e Facenda e Especial de Contas e o vindeiro luns, 23 de febreiro, haberá un pleno extraordinario para debater e aprobar de xeito inicial, se procede, dito orzamento. O pleno será emitido en directo a través da canle de YouTube do Concello de Ames.
Segundo indicou Susana Señorís, concelleira de Servizos Económicos, “as principais claves que se recollen neste orzamento son os novos investimentos, a captación de fondos externos, os servizos de calidade, o compromiso cos/as traballadores/as municipais e a xestión financeira”.
Señarís destacou que “as contías máis importantes da área de investimentos son 1 millón de euros para o novo mercado de abastos e banco de terras de produción local, que está incluído dentro do plan Conecta Ames, que foi seleccionado dentro da convocatoria para a asignación de senda financeira do Fondo Europeo de Desenvolvemento Rexional aos plans EDIL; 1.113.000 euros para dotar de cuberta ás pistas polideportivas do Milladoiro; 810.000 euros para mercar un autobús para a liña Bertamiráns – O Milladoiro; e 416.096,99 euros do PERTE para a mellora da eficiencia do ciclo urbano da auga que recolle un gran número de actuacións clasificadas en tres grandes grupos: planificación, mellora de eficiencia e dixitalización, e xestión da información”.
Por outra banda, dixo que “para o gasto corrente e á prestación de servizos contémplase unha partida de 16.530.307,47 euros que garanten que o Concello funcione con eficacia, mantemento de parques e xardíns, actividades culturais e deportivas, educación, medio ambiente, promoción do comercio, e benestar social. Temos que engadir que moitos destas actuacións non poderían levarse a cabo sen algo fundamental no noso concello, como é o persoal, partida que se incrementa nun 32,32% no que se recolle unha subida do 2,5% de atrasos, a subida contemplada na RPT, e a subida aprobada polo Goberno do Estado. A non aprobación deste orzamento suporía que os atrasos se acumularan, e repercutiría negativamente xa que non se actualizarían as retribucións do persoal. Ademais, non sería posible executar este orzamento sen a colaboración de outras administracións que confían en Ames, resultado de anos de bo facer e responsabilidade”.
Críticas do BNG
No 2024 o BNG de Ames abstívose na votación o que xerou un empate en votos que permitiu aprobar os orzamentos co voto de calidade do alcalde. En esta ocasión os nacionalistas xa avanzaron que a asemblea local decidiu por unanimidade votar en contra “pola imposibilidade dun proceso real de diálogo”.
O certo é que, máis alá do clima que se dera na reunión, Psoe e BNG só se viron nunha ocasión e a resposta do grupo de goberno ás propostas nacionalistas fíxose por correo electrónico.
Un dos principais escollos foi a petición do BNG de desistir do proceso de venda das parcelas públicas e reservar unha porcentaxe para vivenda protexida. A negativa a esta petición bloque posibles acordos nunha negociación que case non comezara.
A voceira nacionalista, Escarlata Pampín dicía que “É imposible negociar con quen non está interesado, chegamos á xuntanza coa mellor das vontades, pese a que nos chamaron cando xa estaba anunciada a data do pleno para a aprobación do orzamento, que era en menos de tres semanas, o que daba idea de que non tiñan nin o máis mínimo interese en dialogar”
O resto da oposición tampouco
O PP tampouco está disposto a absterse nunha votación sobre a que nin tiveron oportunidade de falar aínda que si mandaron algunha proposta. O último grupo da corporación, Espazo Común, tamén parece que votara en contra aínda que se o voto fora favorable seguiría sendo insuficiente.
Así as cousas todo apunta a que o Psoe de Ames apostará por vincular os orzamentos a unha moción de confianza que lle permita, previsiblemente, sacalos adiante e prorrogalos xa ata as eleccións do 2027.
