O BNG pedirá ao goberno central a transferencia dun tramo abandonado da antiga vía férrea Coruña Vigo coa intención de que se converta en senda peonil

O Bloque Nacionalista Galego demanda ao Goberno do Estado o traspaso ao Concello de Ames da titularidade do tramo ferroviario abandonado entre Fraiz e A Moniña, coa finalidade de recuperar o espazo e transformalo nunha senda verde peonil.
O Deputado nacionalista no Congreso do Deputados, Nestor Rego, visitou hoxe a zona acompañado pola voceira municipal do BNG, Escarlata Pampín, e o resto de concelleiros do grupo na corporación.
Nestor Rego explicou que “O que no seu momento foi unha infraestrutura de transporte estratéxica, converteuse nun antigo camiño de ferro en progresivo deterioro que está completamente abandonado”.
Rego engadiu que o obxectivo é “Pasar do abandono e o deterioro a conservalo, polo en valor e transformalo nun recurso útil e beneficioso para a veciñanza”. Para o Deputado “A recuperación deste tramo ferroviario como senda verde axudaría a impulsar un modelo de desenvolvemento máis respectuoso co medio, en coherencia coas políticas da Axenda 2030 que apostan pola mobilidade sustentábel, ademais de promover a rehabilitación do patrimonio en desuso”.
A creación de itinerarios para o tránsito peonil, subliña o deputado nacionalista, contribúe á mellora da calidade de vida, á promoción de hábitos saudábeis e á posta en marcha de alternativas de mobilidade non contaminantes. Neste sentido, o BNG entende que tanto o Ministerio de Transportes como o Concello de Ames deben comprometerse con este proxecto e iniciar as solicitudes pertinentes reclamando o traspaso.
Cumprir o acordado: o BNG de Ames e os Orzamentos municipais
Pola súa parte, a voceira municipal do BNG no Concello de Ames, Escarlata Pampín, lembra que esta actuación foi unha iniciativa da organización nacionalista que formaba parte do acordo entre O BNG e o grupo socialista para a aprobación definitiva dos Orzamentos municipais.
“Conseguir o traspaso figuraba no acordo político entre o BNG e o PSOE para que, coa nosa abstención, os orzamentos saísen adiante. A día de hoxe, nada se sabe sobre as xestións que o goberno municipal realizou sobre o tema” denuncia Pampín.
