займ срочно

O Ames Jazz 2023 será os días 7 e 8 de xullo

0

Bisbarra, 11 de abril do 2023 – O Departamento de Cultura do concello de Ames organiza un ano máis o Ames Jazz que se celebrará os vindeiros 7 e 8 de xullo no Pazo da Peregrina.

Trátase da sexta edición do Ames Jazz e incluirá dous concertos e a proxección de dous documentais. No acto estiveron presentes a concelleira de Cultura, Natividade González; o director artístico, Xacobe Martínez; o músico Alejandro Vargas e a produtora de Diego Alonso, Constance Hurlé.

O primeiro dos concertos programados terá lugar o 7 de xullo, e correrá a cargo de Diego Alonso 5NTET, un grupo liderado polo saxofonista e compositor vigués que dá nome ao mesmo.

As composicións do quinteto nacen da necesidade da expresión a través da música propia do líder da formación, sendo a meirande parte creación do músico. A banda sitúase no eixo do jazz contemporáneo, partindo de diversas abordaxes rítmicas, tímbricas e estilísticas.

Xa na segunda xornada, a do día 8, actuará o trío Alejandro Vargas. O pianista que lle da nome ao grupo, natural de Holguín (Cuba), leva afincado en Galicia dende hai máis dunha década, tras unha longa traxectoria musical no seu país.

A súa carreira está principalmente vinculada ao jazz e á música contemporánea. Chegará a Ames acompañado de José Manuel Díaz no contrabaixo e de Carlos Freire na batería.

A iniciativa englobará ademais a proxección dos documentais “Jazz en liberdade” e “Lady Be Good – instrumental women in jazz”.

A concelleira de Cultura, Natividade González, sinalou que “para min é un pracer presentar este evento, que é dos poucos festivais de jazz que temos en galego, e é un orgullo que se realice en Ames, neste espazo tan emblemático como é o Pazo da Peregrina. Este ano repetimos a fórmula da pasada edición, que acadou un gran éxito, e volveremos a ter dous días de jazz e de proxección”.

Pola súa banda o director artístico de Ames Jazz, Xacobe Martínez, puxo en valor que “o traballo, o talento e a traxectoria dos artistas que van estar no Ames Jazz garanten que o festival vai ser unha marabilla. A proxección dos documentais é unha forma de facer medrar a proposta, e foi un acerto”.

Share.

Comments are closed.