Bisbarra, 21 de decembro do 2022 – O concello de Ames ven de adxudicar o proxecto de mellora dos viarios interiores da aldea de Bueceleiras na parroquia de Bugallido.
O importe total dos traballos foi adxudicado por 242.500 euros. Forma parte do plan “Ames progresa 2021-2022” e inclúe actuacións en arredor de dous quilómetros de treitos, con reformas no asfalto e no pavimento, reparación de fochancas e sendas peonís. Está previsto que nas vindeiras semanas, cando a climatoloxía o permita, se executen os traballos.
Actuarase na parte sur do núcleo, ao longo dunha superficie de 1.130 metros cadrados, na que se levará a cabo a execución dun novo pavimento de formigón con lastras de granito, baixo os que se executarán redes de drenaxe e de alumeado público.
Na parte central e leste das Buceleiras executaranse novas capas de rodaxe con aglomerado asfáltico, que inclúen a reparación de fochancas e, nalgúns tramos nos que sexa posible, a ampliación do viario mediante sobreanchuras.
Ademais, crearanse varias sendas peonís de formigón, que suman un total de 555 metros de treitos. Por último, na parte norte realizarase limpeza de marxes e unha nova plataforma de formigón. As actuacións pecharanse coa sinalización horizontal e cinco sinais de stop.
