Ames, 18/06/2026 – O grupo municipal Espazo Común (ESCO) denuncia que os comedores do Milladoiro e o rural de Ames están “abandonados” polo goberno local, Explican que mentres o goberno “presume de excelencia nos servizos públicos, traballadores/ as e nenos/as dos comedores da EEI do Milladoiro, CEP de Ventín e das unitarias de Covas e A Igrexa soportan temperaturas que roldan os 30 graos”.
Para ESCO o máis grave é que a situación dos comedores é coñecida desde hai máis de cinco anos e malia as reiteradas queixas e advertencias, non se adoptaron as medidas para garantir condicións dignas e adecuadas tanto para os traballadores/as como para o alumnado.
Desde Espazo Común consideran “inaceptable que unha situación desta natureza continúe sen solución mentres o Concello presume da excelencia dos seus servizos públicos”. A realidade que viven diariamente usuarios e traballadores destes centros demostra que existen problemas básicos que seguen sen ser atendidos.
A resposta da Alcaldía, segundo ESCO, foi anegativa a reunirse co comité de empresa e descalificación das denuncias cualificándoas de “panfleto partidista”. Unha actitude “impropia dun goberno que debería escoitar aos traballadores e buscar solucións, non atacar a quen denuncia as deficiencias. Unha actitude que evidencia aínda máis a falta de diálogo institucional e o desinterese por resolver os problemas reais que afectan a O Milladoiro e ao rural de Ames”.
Espazo Común pídelle ao goberno municipal que abandone a confrontación e as descualificacións, sente cos representantes dos traballadores e a lo menos escoite as súas demandas.
