O Concello de Ames celebrou un acto institucional na praza do Concello co obxectivo de mostrar o absoluto rexeitamento da veciñanza amesá á violencia de xénero mediante o uso de roupa de cor negra. Durante o evento procedeuse á lectura do manifesto, no que os grupos municipais incidiron na importancia de que as institucións se involucren para conseguir a erradicación de calquera tipo de desigualdade entre homes e mulleres, así como na necesidade de que a sociedade se una para acabar con este problema, que xa segou a vida de corenta e tres mulleres e oito menores no que vai de ano.
Ao abeiro da campaña “Ames en negro” e dos actos organizados con motivo do 25N, Día Internacional para a Eliminación da Violencia contra as Mulleres, o Concello de Ames organizou hoxe un acto institucional na praza do Concello para mostrar o absoluto rexeitamento á violencia de xénero da cidadanía amesá. Arredor das 12.00h, procedeuse á lectura do manifesto e ao reparto de material da campaña Ames en Negro, formado por camisetas, chapas, pulseiras, bolígrafos e axendas, entre outros. O obxectivo deste evento foi tinguir a praza de negro, como mostra de unión e rexeitamento colectivo da veciñanza amesá fronte as violencias machistas.
Durante a lectura do manifesto, que correu a cargo da concelleira de Servizos Sociais e Igualdade, Luísa Feijóo, da directora do Centro de Información á Muller, Maite Arufe, os concelleiros de Educación e Cultura, David Santomil, e de Economía e Facenda, Genma Otero, e o voceiro de Ames Novo, Quique Costas, os membros do grupo municipal fixeron fincapé na importancia de visibilizar a violencia de xénero, co obxectivo de seguir avanzando cara á súa erradicación. Un paso vital para alcanzar a igualdade entre homes e mulleres, un traballo de todos porque “nos compromete a todas e todos”.
Neste senso, púxose o acento na necesidade de que as institucións sigan lexislando en favor da igualdade de xénero, que convertan este tema “nunha prioridade institucional e política para as administracións de todos os niveis de goberno”, para o que “é preciso un consenso institucional, político e social así como a coordinación entre as diferentes administracións con competencia na materia”. Podes acceder ao manifesto completo premendo no enlace que está a túa dereita, baixo o apartado de descargas.
Trala lectura do manifesto, que rematou co rexeitamento unánime das formacións políticas presentes cara calquera tipo de violencia machista, así como “de quen as exerce e da complicidade de quen as silencia”, Paula Viñas Lamas, alumna do IES de Bertamiráns, procedeu á lectura dun poema propio.
A continuación, contouse coa actuación do grupo formado por Neves Seara, Migui Carballido, Laura Lamontagne e Zeltia, que, da man da Casa Morada, se encargaron da música e a poesía do acto cunha performance sacada do seu espectáculo Silencios Impostos.
Nesta última parte, tamén houbo un momento o recordo das vítimas de violencia de xénero e violencia doméstica que deixou este 2018, coa colocación dunha cartilla por cada unha delas nas escaleiras da Casa do Concello mentres se lles recordaba aos presentes os seus nomes.
