Compostela, 21 de marzo do 2018 – O Día Mundial da Poesía comeza hoxe en Compostela co estoupido dun cento de foguetes. Será o punto de partida dun programa de actos que durará ata o próximo sábado 24.
O programa de actividades do Día Mundial da Poesía esta organizado pola Concellería de Acción Cultural compostelá e conta coa colaboración da Secretaría Xeral de Política Lingüística. A primeira actividade será as oito de esta tarde e consistirá nun recital no que participan algunhas das voces máis singulares da poesía actual, ademais de presentar o primeiro Manifesto do Día Mundial, que realizou para a ocasión María Xosé Queizán. O recital, deste xeito, permitiralle aos afeccionados gozar da voz de Andrew McMillan, Salvador García Bodaño, María Sevilla, Olga Novo, Isaac Xubín e Olvido García Valdés, unha das autores de culto da Literatura española.
Para mañá xoves 22, está previsto ás once da mañá un café-diálogo no que participan Andrew McMillan, Olvido García Valdés e Isacc Xubín. A partir das sete da tarde, terá lugar o recital Catro graos de abertura, título que fai referencia aos catro graos de abertura das vocais en galego e que, nun programa dobre, inclúe dous enfrontamentos de regueifa [Alba María con Queco Díaz e Lupe Blanco con Suso de Xornes] e un torneo de slam, coa participación dos mellores slamers que actualmente traballan en Galicia e Portugal: Duke Sam, Nuria Vil, Oriana Méndez, Carlos da Aira, Esther Carrodeguas, Raquel Lima e Vítor Hugo Moreira. O torneo, con acompañamento musical de Velpister, estará presentado por Silvia Penas. Para pechar a xornada, a partir das dez da noite, o recital Poesía no fío ofreceralle aos espectadores a proposta nos lindeiros poéticos que formulan, conxuntamente por encargo do festival, Clara Gayo, Carlos Santiago e Zé Paredes.
O venres 23 divídese en tres apartados, que abranguen desde a poesía performática á videopoesía. Ás seis e media da tarde, o festival propón no recital Atravesei a verxa un percorrido por insólitos espazos do Teatro Principal a través das voces de Isaac Xubín, Luísa Castro, Xabier Xil Xardón e Javier Peñafiel. Os espectadores [serán grupos reducidos e cumprirá reservar previamente] non só se adentrarán en liñas de recitación personalísimas senón que tamén descubrirán ámbitos do teatro con acceso restrinxido, como o fallado, as terrazas ou os camerinos. A partir das oito da tarde, dese mesmo 23 de marzo, celebrarase unha sesión centrada na Escrita en conflito, título que reúne o testemuño directo de Miguel-Anxo Murado sobre a Literatura nos espazos de conflito bélico, e o recital do refuxiado sirio Mohamad Frias Alshaheen e o saharauí Bahia Mahmud Awah, presentado por Iván Prado, responsable da organización Pallasos en Rebeldía. A xornada pecharase a partir das nove e media da noite coa proxección de varios videopoemas de Miriam Reyes, Estela Pan, Cintaadhesiva e Celia Parra.
O sábado 24, o festival clausúrase cun recital ás dez da noite, presentado por Ana Romaní, no que participan Estíbaliz Espinosa, Ana Vallés con Nuria Sotelo e Lupe Gómez, ademais de Niño de Elche.
