Touro, 15/07/2026 – A mina de Touro segue sen ser restaurada como marca a lei, pero o que pode ser aínda peor é que pode reabrir se finaliza a tramitación que a empresa ten en marcha. A cualificación como proxecto industrial estratéxico (PIE) ven de acelerar esa tramitación.
A deputada do BNG Saleta Chao acusou ó Goberno da Xunta de actuar como “comercial” da empresa da mina de Touro-O Pino e esixiu, máis unha vez, a paralización da súa declaración como proxecto industrial estratéxico (PIE).
Chao advertiu de que esa declaración “permitiu pisar o acelerador e reactivar de golpe toda a tramitación” e, en consecuencia, a ameaza que supón este proxecto no entorno, con especial afectación na bacía do Ulla e na ría de Arousa.
As veces as Comisións Parlamentarias son as que desvelan a realidade dos feitos, máis alá dos plenos do Parlamento. Na Comisión sexta Saleta Chao preguntou o director xeral de Planificación Enerxética e Minas, Pablo Fernández Vila, que vai facer a Xunta respecto á sentenza de febreiro deste ano do TSXG que ordena retrotraer as actuacións administrativas ao momento inmediatamente anterior á DIA desfavorable de 2020.
A Deputada nacionalista explicaba que “Con esta sentenza ábrese unha situación anómala na que a Xunta debe retomar a DIA respecto do proxecto de 2027 mentres ten en tramitación un PIE para o mesmo proxecto desde 2024, o que xera unha situación de inseguranza sobre a que a Administración galega debe aclarar que vai facer”.
Saleta Chao emprazou ademais o Goberno de Rueda a atender á mobilización veciñal e de entidades sociais e ambientais que rexeitan “de plano” a reactivación dun proxecto contaminante que, alertou, vai empeorar a situación na que se atopan o río Ulla e a ría de Arousa, “a máis produtiva a nivel marisqueiro do noso Pais, con preto de 4.000 empregos directos e onde xa se pode apreciar a sedimentación por cobre procedente da mina”.
“Fronte ás protestas do sector, a Xunta preferiu mirar cara outro lado e poñer a mina por diante da ría e por diante da xente, poñer o beneficio económico curtopracista por diante do futuro ambiental e produtivo do nos País”, lamentou, para criticar o intento do PP na Xunta de “limitar a participación social negando a condición de interesado a persoas e entidades dos concellos afectados, ao contrario do que establece a lei”.
No debate da iniciativa parlamentaria, Saleta Chao lembrou ademais o recente informe do Icomos no que se alerta sobre posible afección que a mina vai ter sobre o Camiño de Santiago ao seu paso polos concellos de Touro e O Pino. “O Camiño é o principal produto turístico do noso País e patrimonio da humanidade desde o ano 1993 e o informe do Icomos, é cando menos preocupante para a súa preservación”, advertiu.
A deputada do BNG advertiu, por outra banda, do consumo dunha grande cantidade de recursos hídricos que implicaría a reactivación da mina, cuestionando así se o proxecto, desde ese punto de vista, é compatible co momento de “emerxencia climática sen precedentes” que estamos a vivir, lembrando que a Xunta xa declarou xa a estas alturas do ano a prealerta por sequía nun bo número de concellos.
“Os gobernos deberían gobernar para a xente, pero os feitos demostran que vostedes non o fan”, subliñou Chao en alusión á “folla de ruta” que está a seguir o Goberno de Rueda neste e noutros proxectos: “Tirar para adiante pasando por alto a oposición veciñal e de todas as entidades que presentan alegacións contra un proxecto que é unha ameaza polo seu impacto ambiental e económico”, concluíu.
