Os veciños de Santa Comba veñen de dar un xiro de 180 graos na política local. Despois de censuras, alcaldes con só dous concelleiro e censurados apoiando a censuradores, o pobo outorgoulle a maioría absoluta ao socialista Alberto Romar.
Non será ese complexo pasado o único que Alberto Romar terá que afrontar . Por unha banda nunca estivera en política, o cambio de rumbo en Santa Comba é máis absoluto que a propia maioría. E por outra parte a situación económica e organizativa, como veremos, está lonxe de ser sinxela.
Comecemos polo principio. Alberto Romar foi presidente da Asociación de Empresarios e desde hai tempo tiña propostas e apoios para entrar en política, tal vez por todo o sucedido nos anteriores mandatos. Acabou sendo o candidato do Psoe, partido ao que di estar moi agradecido
Romar explica que unha das claves para entrar en política foi, ademais dos apoios recibidos, o cansazo da xente de ver sempre as mesmas caras en política. Lembra que tres dos candidatos xa foran alcaldes en seis ocasións.
Vindo dunha situación tan particular é obrigatorio preguntar polo traspaso de poderes e por como atopou o concello. Alberto Romar non recibiu nin unha chamada de María Pose, a anterior alcaldesa; o fair play, xogo limpo, brillou pola súa ausencia.
A situación é crítica con dous millóns e medios de facturas pendentes de pago e inversións realizadas despois das eleccións que están sendo analizadas
Esta mala situación económica é peor se pensamos que hai facturas emitidas con traballos sen realizar. Alberto Romar explica que pensa fiscalizalas todas e critica que durante os últimos mandatos fixérase unha política individual para catro amigos, a súa intención en este mandato e dar o xiro cara a unha política colectiva, para todos.
O novo alcalde asegura que garantirá o servicios mínimos. As malas xestións afectan a todos os departamentos pero os servizos sociais o notan máis, unha estrada con fochancas pode agardar pero servizos como axuda a domicilio non. Romar pon varios exemplos de mala xestión e o resume nunha frase “parece que en Santa Comba se facían mal as cousas adrede”.
Rematamos a entrevista pedíndolle unha pinga de esperanza. Alberto Romar comeza a falar do seu equipo, explica todo o que están a facer e pon en valor o tempo que lle están dedicado ao concello.
A firmeza coa que Alberto Romar explica o traballo que están facendo en estas primeiras semanas, o empeño en poñer orde para saber cen por cen onde están e onde queren ir, é algo que sorprende, por moito que sexa lóxico.
Nunha política local cunha taxa moi baixa de renovación que cheguen novas persoas, e que o fagan con sentido común, é de agradecer. Nos vindeiros meses verase si Santa Comba entra nunha nova época ou a desfeita foi tan grande que con devolver todo ao seu sitio é dabondo.
Unha das cousas que Alberto Romar dixo na entrevista é que trataría de lograr ese cambio aínda que só fora alcalde catro anos. Que non pense en perpetuarse no posto é o mellor para poder traballar sen ataduras.
