Luís Rey era designado pola asemblea local do PSdeG de Oroso como sustituto de Manuel Mirás o pasado mes de maio. A finais de mes recibía o bastón de mando do anterior alcalde nun pleno extraordinario.
Falamos con el cando a presunta normalidade parece facerse persistente. Rey, e o resto de concelleiros, traballaron arreo todo este período ao lado de Mirás polo que levar no cargo menos de cinco meses só fixo aumentar o nivel de responsabilidade.
Luís Rey recoñece que foi unha época moi difícil, de moito traballo, pero que se cumpriu o obxectivo de estar a carón dos veciños
Como en outras entrevistas con alcaldes, queda patente que os concellos son a administración á que acoden os cidadáns en primeiro lugar aínda que as competencias en materias como sanidade non sexan municipais. Luís Rey cre que é o momento de retomar os servizos e de que todo volva a funcionar
O pasado mes de setembro Oroso elevaba a reserva de vivenda protexida nas novas edificacións ao dez por cento. Rey explica que coa ampliación do polígono o concello entra nunha fase de crecemento que pode traer máis xente a vivir ao municipio
En estes poucos meses Luís Rey tamén tivo tempo de entrar no debate político coa oposición. A demanda da alcaldesa de Trazo, Josefina Suárez, e o voceiro do PP de Oroso, Alejandro Doval, pedían unha modificación nun dos proxectos máis esperados na bisbarra como é a futura Vía verde entre Cerceda e Compostela
Un dos proxectos estrela de esta lexislatura era a ampliación de centro multiusos de Sigüeiro pero a quebra da empresa que o levaba a cabo dou ao traste con todo. En este momento vólvese a licitar polo que pronto poderá rematarse. Un proxecto que, como nos conta Luís Rey, é moi esperado entre outras razóns por unha biblioteca dixitalizada que permitira o acceso as 24 horas os sete días da semana
Oroso é un concello que sempre ten proxectos abertos, un municipio en constante cambio e crecemento. A pouco máis dun ano e medio das eleccións ao novo alcalde aínda lle quedan moitos plans no peto
Luís Rey leva máis de 20 anos vencellado ao concello de Oroso. Foi o responsable de que Manuel Mirás volvera ao partido socialista e creou a Escola Deportiva Xuventude Oroso, onde implantou un sistema de traballo que a levou a converterse nunha das canteiras referentes a nivel nacional. Coñece Oroso á perfección, algo que se percibe desde que un comeza a falar con el. Sustituir a un rexedor como foi Manuel Mirás, referente en toda a bisbarra, non é doado pero Rey polo momento o está conseguindo.
