Goretti Sanmartín é a primeira alcaldesa de Santiago de Compostela. En realidade é a terceira porque dúas mulleres do BNG, Encarna Otero no 1999 e Soco García no 2008, foron alcaldesas en funcións por ausencias de Sánchez Bugallo nas vacacións de verán.
Tras oito anos na oposición, de 2015 a 2019 como número dous con Rubén Cela e desde hai catro anos como número un; ven de triplicar o número de concelleiros e adiantar en votos ao Psoe, ao que deixa sumido nunha crise local.
Comezamos a conversa preguntándolle como se sinte. Tanto Bugallo como Martiño Noriega xa foran alcaldes e tiñan unha idea aproximada dos primeiros pasos. Goretti ten experiencia política dabondo para afrontar o reto pero as sensacións teñen que ser moi especiais
A nova alcaldesa dicíanos antes das eleccións que o peor como candidata era ter que superar esa timidez que a caracteriza. Non podemos evitar recordarllo porque o bo resultado electoral, en este tema, a pon máis aínda baixo o foco
A costume non escrita de deixar cen días antes de comezar a facer unha oposición en serio non se respectou nin unhas horas. O mesmo día da investidura o Partido Popular convocaba aos medios a unhas declaracións nun dos salóns do concello. Para Goretti foi unha sorpresa esta actitude e engade que desde as propias filas do PP certas persoas recoñeceron que non estaban ao cen por cento con ese posicionamento
O outro partido que estará na oposición será o Psoe. Unha decisión que Goretti Sanmartín cualifica como “rara”. A alcaldesa esperaba que entraran no goberno e non se atrevería a dicir canto da decisión corresponde ao partido a nivel local e canto a nivel galego.
A primeira reunión formal do novo goberno foi con Antonio López, o reitor da USC. Concello e Universidade teñen desde hai anos unha tarefa pendente que é a de tirar partido da relación entre as institucións. Sempre se fala da necesaria colaboración pero parece que nunca chega a concretarse. En este novo tempo Sanmartín aposta por eliminar barreiras ficticias e traballar nun espazo único.
Falar de como están en concreto certos temas cando o goberno acaba de tomar posesión pode resultar precipitado. Decidimos preguntar polo nivel de dificultade que pensa que vai ter para sacar a diante certos temas. Un baremo no que 1 e moi pouca dificultade e 10 moita dificultade. Temas como a taxa turística, o contrato da auga, trasporte público ou Casa da Xuventude son algunhas das cuestións sobre as que pedimos a súa opinión sobre ese nivel de dificultade.
A última cuestión ten que ver coa comarca. Compostela adoita a vivir de costas aos concellos da bisbarra. Sanmartín explica que o BNG sempre aposta pola comarcalizacións que existen moitos temas nos que traballar conxuntamente.
Tras a timidez de Goretti Sanmartín agóchase un profundo coñecemento da cidade, tanto a nivel humano como político. Será unha lexislatura moi complexa pero a nova alcaldesa transmite unha sensación de eficiencia que terá que contar co resto dos grupos para facerse realidade.
Todos están de acordo en que Compostela necesita dar un xiro e encarar os vindeiros anos cunha idea distinta de cidade. No primeiro ano unhas eleccións xerais e unhas autonómicas o complican todo aínda máis. Ao fronte unha alcaldesa da que todos, propios e alleos, recoñecen a capacidade de traballo, non é mal comezo.
