O PP de Padrón cualifica ao alcalde de “miserable” por cargar ao concello gastos de locomoción de 0,78 e 1,30 €
Que os alcaldes teñen que cobrar os gastos de desprazamento se levan o seu vehículo non só é legal, é de sentido común. Todos? O PP de Padrón abre un debate ético e cualifica ao alcalde, Anxo Rei, de “miserable” porque varios de eses custos non chegan aos 2 euros.
O tesoureiro da Xunta Xestora, Diego Pardal, considera “indignante” que o rexedor, Anxo Rei, que cobra 43.500 €, cargue ás arcas municipais os custos “irrisorios” de desprazamentos a reunións ou actos en Pontecesures ou Lestrobe (Dodro)
Pardal critica tamén que cargue ao concello “OS gastos das viaxes a Santiago para gravar “entrevistas de autobombo”. Para o PP estas prácticas son “pouco éticas e totalmente incongruentes co seu discurso, e destapan a verdadeira faciana política de Anxo Rei”.
Seis meses de dietas
Diego Pardal precisa que os integrantes da Xunta de Goberno Local do pasado día 27 de maio aprobaron unha remesa de gastos de locomoción e dietas do alcalde que comprende desde o 3 de xullo de 2024 ata o 24 de xaneiro de 2025 e que ascende a un importe total de 812,48 euros, figurando nesa relación algunhas indemnizacións que considera “indignantes” polo seu “ridículo importe” e pola “mínima distancia dos desprazamentos”.
O concelleiro popular tacha de “especialmente mesquiño” que o rexedor local repercuta ás arcas municipais un gasto de 0,78 € por un desprazamento de tres quilómetros a Lestrobe (Dodro) o 8 de novembro de 2024 para asistir á clausura do Programa Integrado de Emprego; outra indemnización de 1,30 € por asistir o 17 de xaneiro de 2025 en Pontecesures á inauguración do Programa Integrado de Emprego; e outra indemnización de 1,56 € por asistir o 7 de xullo de 2024 á festa do Carmen de Pontecesures na igrexa de San Xiao.
A relación inclúe outras indemnizacións “sorprendentes” por importe de 2,60 € por 10 quilómetros de desprazamento para asistir en Rois a actos relacionados co Obradoiro de Garantía Xuvenil en outubro de 2024 ou incluso outros 2,60 € por percorrer 10 quilómetros o 10 de outubro de 2024 para asistir na Paxareira (Dodro) á xornada de portas abertas da Andaina Pro Saúde Mental.
Segundo o tesoureiro da Xunta Xestora do PP padronés, “estas prácticas, pouco éticas e totalmente incongruentes co discurso de Anxo Rei, destapan a súa verdadeira faciana política”, que na súa opinión é “a dun alcalde que predica unha cousa e fai a contraria e que está máis preocupado polo seu peto que polos intereses xerais da veciñanza”.
Diego Pardal destaca que “Non nos opoñemos a que o alcalde perciba as indemnizacións que lle corresponden por dietas e gastos de locomoción, pero cremos que é inadmisible un comportamento tan ruín e miserable cando o propio Anxo Rei vai dando leccións de vida e de xestión pola rúa e nas redes sociais”. “Ademais, estamos a falar de que Anxo Rei é o alcalde do goberno máis caro de toda a historia recente de Padrón, xa que incrementou as retribucións do executivo local nun 55%; é tamén o alcalde que aprobou ás agachadas unha subida da taxa do lixo que pronto comezará a notar a veciñanza nos seus recibos; e é o alcalde que agora descubrimos que tamén lle carga ás arcas municipais os gastos dos seus desprazamentos a Santiago para gravar entrevistas de autobombo que paga cos cartos de todos os padroneses e padronesas”, resaltou Diego Pardal.
