Un ano máis a Federación Galiza Cultura, da man da AC. O Galo e a AC Vagalumes celebran no cumio do Pico Sacro a Alba de Groria
Corría o ano 1948 cando Alfonso Daniel Rodríguez Castelao subíase ao escenario do Teatro Argentino de Buenos Aires no festival que celebraba o Centro Galego da cidade. O seu discurso, as súas verbas, conmemoraban o Día da Patria Galega e foi publicado días despois na Nosa Terra para ser coñecido desde entón como Alba de Groria.
Un discurso que Castelao comezara a escribir un ano antes en Marsella, Francia. Un texto dos máis fermosos de Castelao e que coa nova do seu pasamento un grupo de amigos lembraron subindo ao Pico Sacro.
Desde o 2011 esta subida e lectura da Alba de Groria conmemorase por parte da Federación Galiza Cultura, da man da AC. O Galo e a AC Vagalumes, canto máis este ano que se cumpren 75 anos da súa morte.
Este sábado 19 terán lugar estes actos que comezarán coa benvida e subida do último tramo co seguinte programa:
12:00h.: Benvida e intervención de Manuel Rey profesor e estudoso da figura de Castelao.
12:30h.: Subida ao último treito do cumio do Pico Sacro con parada na capela. Xa no petouto, as AC. Vagalumes, AC. O Galo e varias asistentes, lerán Alba de Gloria de Castelao.
13:30h.: Baixada con parada para ver a chamada cova e a rúa da Raíña Lupa.
15:00h. aprox.: Xantar de convivio no val do Ulla. O lugar depende da climatoloxia e cada quen levará a súa comida, bebida e os aparellos necesarios.
17:30h. aprox: Saída para Compostela para ollar, no salón Fonseca da USC, a exposición Traxes e colores de Galiza. Identidade Nacional nas artes Plásticas de Castelao, mostra comisariada por David Quiñones e promovida por pola Asociación Etnográfica Sete Espadelas, con motivo do 75 cabodano do pasamento de Castelao.
Máis sobre Alba de Groria
https://consellodacultura.gal/mediateca/extras/CCG_2018_Alba-de-gloria.pdf
