Compostela, 30/05/2026 – O Ateneo de Santiago, en colaboración coa Real Academia Galega de Ciencias, celebrará o vindeiro luns, 1 de xuño, ás 19.30 horas, unha nova sesión dos Luns do Ateneo na Rúa do Vilar, 19.
A conferencia, titulada «Aida Fernández Ríos: da produtividade das rías á acidificación oceánica», estará impartida por Fiz Fernández, Profesor de Investigación do CSIC e membro da Real Academia Galega de Ciencias.
A sesión estará dedicada á figura de Aida Fernández Ríos, distinguida como científica galega do ano, e permitirá afondar nas súas contribucións ao coñecemento do medio mariño. A conferencia abordará cuestións clave da oceanografía actual, como a produtividade das rías, a capacidade do océano para absorber dióxido de carbono ou os efectos da acidificación das augas, aspectos fundamentais para comprender os cambios ambientais e climáticos que afectan ao planeta.
Fiz Fernández Pérez leva máis de catro décadas dedicado ao estudo do océano e dos procesos relacionados coa absorción de dióxido de carbono e a evolución das súas augas. É autor de máis de 230 publicacións científicas amplamente citadas a nivel internacional e participou en máis de vinte campañas oceanográficas, acumulando arredor de 850 días no mar, entre elas dúas inmersións no submarino Nautile para inspeccionar o pecio do Prestige.
Ademais da súa actividade investigadora, desenvolveu unha ampla labor formativa a través da dirección de máis de vinte teses doutorais, contribuíndo de maneira decisiva á proxección internacional da oceanografía española.
