Bisbarra, 28 de novembro do 2022 – ADEGA ven de presentar unha denuncia por presunta prevaricación contra a anterior Directora Xeral de Planificación Enerxética e Recursos Naturais da Xunta de Galicia, Paula Uría.
A Asociación para a Defensa Ecolóxica de Galiza (ADEGA) vincula esa presunta prevaricación, e malversación de fondos, coa tramitación do plan industrial dos parques eólicos de “Campelo” e “Lamas de Feás”, proxectos da empresa Greenalia Wind Power.
Unha documentación da propia empresa
O parque eólico de Campelo sitúase entre Coristanco e Santa Comba; o de Lamas de Feas nos concellos ourensáns de Baltar, Calvos de Randín e os Blancos. Como contamos en Lindeiros a xustiza paralizou de forma cautelar a construción do de Campelo. Na documentación aportada pola empresa en ese procedemento, para impugnar a decisión, é onde ADEGA atopa as irregularidades que derivan na denuncia.
Todo comeza no concurso eólico da Xunta do ano 2010. En ese momento a empresa Kaekias Eólica S.A. acadou a asignación de 75MW co compromiso de executar a maiores un plan industrial específico, ou de monetarizalo nun importe económico que tería que ser depositado no fondo capital-risco (SOGIGA) do Instituto Galego de Promoción Económica (IGAPE), no prazo dun mes desde a posta en funcionamento dos parques eólicos.
No 2016 Greenalia adquire esa empresa e faise coa titularidade de ambos os dous proxecto e, ao entender de ADEGA. coas obrigas adquiridas no concurso por Kaekias. No 2019 a nova empresa presenta a proposta que solicita que se de por rematado o Plan Industrial. En xullo do 2021 a Xunta de Galicia emite unha resolución na que se da por executado o plan industrial dos dous parques eólicos.
Na práctica a resolución asinada por Paula Uría acepta a proposta de Greenalia de dar por executado o plan e exime a empresa de pagar os preto de 12.000.000 de euros á Facenda pública comprometidos na adxudicación do 2010.
Un barco, un hotel e biomasa
Para presentar a proposta, na que solicita que se de por executado o plan industrial, Greenalia presenta como actividades realizadas as levadas a cabo pola empresa entre os 2015 e o 2019, mesmo antes de comprar Kaekias.
As actividades industrias que aportan son un negocio hoteleiro, un proxecto de buque para a exportación do sector forestal e un proxecto de xestión de biomasa. Ningunha de estas actuacións foi valorada no concurso do 2010 no que se adxudicaron os megavatios eólicos. A resolución emitida desde a Xunta en xullo do 2021 indica literalmente que “a comisión [de seguimento] comproba que a empresa solicita cambiar de monetarizar a executar un novo plan industrial con novas actuacións non valoradas durante o concurso de 2010”.
Actividades subvencionadas
Ademais de que se tomen actividades non valoradas no concurso para dar por completado o plan industrial hai outra característica que incide na denuncia por presunta malversación de fondos e prevaricación.
ADEGA destaca o feito de que o Grupo Greenalia desenvolve actividades vinculadas á xestión de biomasa, a mesma que se inclúe no plan industrial dado por completado. Esas actividades recibiron axudas da Xunta de Galicia e mesmo un préstamo de un millón de euros.
Isto significa que a Resolución da dirección xeral de planificación enerxética denunciada na Fiscalía non só tería dado por executado irregularmente o proxecto industrial de referencia, senón que ademais teríao dado por executado en base a determinadas actividades para cuxo desenvolvemento o Grupo Greenalia obtivo axudas públicas.
ADEGA denuncia a especial gravidade que se deriva de que o proxecto se teña dado por executado, creando así un perigoso precedente. A asociación ecoloxista alerta de que unha situación semellante se poida dar cos outros parques eólicos que tiveran a súa orixe na convocatoria de 2010 e que aínda se atopen en tramitación, coa conseguinte lesión que isto suporía para a Facenda pública.
Ante estes feitos, ADEGA invoca ao Ministerio Fiscal para que investigue a posible concorrencia dun delito de prevaricación en concurso con outro de malversación por parte da titular da Dirección Xeral de Planificación Enerxética e Recursos Naturais en xullo de 2021. Ao tempo, anuncia que requirirá á Xunta información sobre o estado de execución dos distintos plans industriais comprometidos no concurso eólico de 2010 pola potencia adxudicada a proxectos eólicos que hoxe en día se atopan en tramitación.
