Actualización 27 de outubro do 2022 – ADEGA informa de que ” A sociedade galega consegue facer efectiva a paralización cautelar do parque eólico Campelo e está a piques de conseguir tamén a suspensión cautelar efectiva do parque eólico Bustelo, a través da campaña de recadación solidaria “Ti podes paralos!”.
Bisbarra, 25 de outubro do 2022 – Baixo lema #tipodesparalos Adega impulsa unha recadación solidaria de fondos para paralizar os parques eólicos de Campelo e Bustelo.
O Tribunal Superior de Xustiza de Galicia, TSXG, emitiu unha paralización cautelar de estes parques eólicos que afectan a Santa Comba, Coristanco e Carballo. Para que sexa efectiva hai que depositar antes do 1 de novembro un aval de 20.000 €.
Este aval ou garantía requírese ás entidades recorrentes (ADEGA e PDCC) co obxecto de “responder dos prexuízos de calquera natureza que puidesen derivarse da medida cautelar”, como así o establece o TSXG nos autos de 19 de setembro e 6 de outubro, relativos á paralización cautelar dos parques eólicos Campelo e Bustelo, respectivamente.
Ademais, é previsible que nas seguinte semanas o TSXG acolla tamén a solicitude de paralización cautelar do proxecto Monte Toural. Unha solicitude de paralización realizada tamén por ADEGA e PDCC que podería supoñer dez mil euros máis de aval.
Para facer fronte a este reto, ADEGA apela con urxencia á solidariedade colectiva para “pararlle os pés a Greenalia e aos abusos do actual modelo eólico da Xunta, agresivo co territorio e coas persoas”. Desde a organización ecoloxista ADEGA requírese con urxencia o apoio de colectivos, plataformas, e do conxunto da cidadanía para impedir, a través do depósito dos avais, que se inicien as obras dos tres parques eólicos de Greenalia, evitando que se produzan danos ambientais e sociais irreparables.
Desde ADEGA explican que se da “unha oportunidade única para frear o modelo eólico devastador da Xunta, mais tamén nos enfronta a un reto difícil: conseguir recadar 20.000 euros para depositar como aval antes do 1 de novembro”.
Toda a información relativa á campaña de recadación colectiva estará dispoñible no sitio web https://tipodesparalos.adega.gal
ADEGA ofrece dúas modalidades de colaboración ou achega solidaria, a través de doazón ou préstamo. Deste xeito, calquera persoa ou entidade con personalidade xurídica poderá contribuír segundo a opción que máis lle conveña. Mentres a doazón ofrece a posibilidade de desgravar ata un 80% na declaración da renda, o préstamo solidario poderase recuperar por parte do prestamista no caso de que as sentenzas dos recursos contenciosos-administrativos presentados contra estes proxectos eólicos acaben resultando favorables.
As doazóns á campaña “Ti podes paralos!” poderán efectuarse no sitio web https://doazons.adega.gal
E os préstamos solidarios poderán depositarse, seguindo as instrucións do formulario https://prestamos.adega.gal
ADEGA actualizará periodicamente na súa páxina web a evolución da cifra recadada. Calquera dúbida relacionada coa campaña ou coas distintas modalidades de achegas, pódese consultar a través do teléfono 981570099 ou no correo electrónico xestion@adega.gal.
