Bisbarra, 19 de xullo do 2023 – Nunha acción coordinada en toda Galicia, Adega dirixiuse a centos do alcaldes que tomaban posesión pera pedirlles apoio contra os eólicos.
Na bisbarra de Compostela a alcaldesa de Santiago, Goretti Sanmartín, ou alcaldes como Manuel Ángel Leis en Negreira, José Antonio Pereira en A Baña ou Diego Díaz en Val do Dubra escoitaron as demandas ecoloxistas contra os eólicos.
A Coordinadora “Eólica Así Non” fixo presenza nas tomas de posesión, a través dos seus membros, para apelar aos novos concelleiros e concelleiras a apoiar as iniciativas reivindicativos e xurídicas locais fronte a actual invasión eólica.
Adega e a coordinadora demandaron de este xeito “un modelo enerxético xusto, sustentábel, ordenado e deseñado para as persoas e para a transición ecolóxica, e non en beneficio das grandes multinacionais da enerxía”.
Con esta iniciativa, Eólica Así Non pretende involucrar e facer conscientes ás novas corporacións municipais “do difícil momento no que nos atopamos tras a aprobación de máis de 75 macroproxectos eólicos por parte da Xunta de Galiza, aos que se suman os autorizados polo goberno do Estado”.
Proxectos que nos vindeiros meses comezarán a “invadir montes, espazos naturais, fontes e mananciais, lugares de interese paisaxístico, corredores ecolóxicos e a eliminar biodiversidade e patrimonio cultural en boa parte dos galegos se estes non fan nada para paralos”.
A Coordinadora “Eólica Así Non” aproveitou a xornada para resaltar o papel determinante que os novos gobernos municipais van ter nesta fase de ocupación macroeólica. As corporacións van ter unha ocasión especial para cumprir coa súa promesa de defender o interese xeral da veciñanza e cumprir escrupulosamente coa legalidade vixente, “non favorecendo, por tanto, aos sectores que especulan e atentan contra a preservación de recursos básicos, do medio ambiente, do patrimonio e da saúde da nosa sociedade”.
As plataformas e entidades contrarias á especulación e depredación eólica solicitaron ás voceiras municipais de todas as formacións políticas que constitúen goberno que apoien expresa e decididamente as accións xurídicas que os colectivos sociais ou de afectados/as están poñendo en marcha e que recorran directamente nos tribunais aquelas autorizacións de proxectos macroeólicos que exercerán danos irreparábeis no concello ou que poñen en risco o benestar e futuro das súas veciñas e veciños.
Nesta fase, tamén serán os gobernos locais os encargados de outorgar os permisos e licenzas necesarias para que as promotoras podan iniciar aos obras de instalación das infraestruturas eólicas nos montes de Galiza. Neste senso Adega advirte ás “novas rexedoras e rexedores municipais que calquera intento inxustificado de beneficiar ou favorecer ditas obras será convenientemente denunciado”.
